जनकपुरधाम, १४ मंसिर । नेपाल युवा उद्यमी मञ्च (एनवाइइएफ) जनकपुर च्याप्टरले इन्टरनेशनल आइडियाको सहकार्यमा आयोजना गरेको ‘बिजने कनेक्ट डायलग’ आइतबार जनकपुरधाममा सम्पन्न भएको छ।

आर्थिक अनिश्चितता, सुरक्षा चुनौती र लगानी वातावरणमा परेको असरबारे खुला बहस गर्ने उद्देश्यले आयोजित कार्यक्रममा विभिन्न क्षेत्रका करिब ६० जना उद्योगी व्यापारी, आयातकर्ता, आपूर्तिकर्ता, खुद्राव्यवसायी, अटोमोबाइल क्षेत्रका प्रतिनिधि, होटल पर्यटन क्षेत्रका व्यवसायी तथा अन्य सरोकारवालाहरूको सहभागिता रहेको आयोजकहरूले जनाएको छ।

हालै नेपालमा भएको जेनजी आन्दोलन तथा सेप्टेम्बर ८ देखि १३ सम्मका घटनाक्रमपछि निजी क्षेत्रमा बढिरहेको असुरक्षा, बजारमा देखिएको मनोवैज्ञानिक दबाब र व्यवसायिक आत्मविश्वासमा आएको गिरावटलाई कार्यक्रमले मूल एजेन्डा बनाएको थियो।

सहभागीहरूले आर्थिक गतिविधि सुस्ताउन थालेको, लगानी वातावरणमा नकारात्मक सन्देश गएको र जोखिम मनोवृत्ति बढेको अनुभव साझा गर्दै तत्काल ठोस कदम आवश्यक रहेको निष्कर्ष निकाले।

संवादमा खुद्रा व्यापार, थोक आपूर्ति, आयात निर्यात, अटोमोबाइल, उत्पादन उद्योग, होटल पर्यटन तथा सेवा क्षेत्रका प्रतिनिधिहरूले नीति तथा प्रशासनिक स्थिरताकै अभावले व्यवसाय सञ्चालन चुनौतीपूर्ण बनेको बताए।

सुरक्षाको प्रत्याभूति, वित्तीय पहुँच सुधार, कर तथा व्यापारिक नीतिमा स्पष्टता, बजार अनुगमनको पारदर्शिता र निजी क्षेत्रबीच आपसी समन्वय बढाउनुपर्ने सुझावहरू यसैक्रममा प्रस्तुत गरिएका थिए।

उद्योगी व्यापारीहरूले हालको आर्थिक वातावरणमा व्यवसाय टिकाइराख्नका लागि सरकार, निजी क्षेत्र र समुदायबीच नियमित संवाद अपरिहार्य भएकोमा जोड दिएका थिए।

उनीहरूले मधेश प्रदेश तथा देशभर आर्थिक स्थिरता कायम राख्न साझा कार्ययोजना, दीर्घकालीन नीतिगत प्रतिबद्धता र सुरक्षा व्यवस्थामा सुधार अनिवार्य रहेको विचार राखे।

एनवाइइएफ जनकपुर च्याप्टरका प्रथम उपाध्यक्ष नविन साहले कार्यक्रममार्फत व्यक्त गरिएका सुझाव र निष्कर्षहरूलाई आगामी चरणमा सम्बन्धित निकायहरूसँग साझा गरिने बताए।

उनले यस्तो प्रकारको संवाद निजी क्षेत्रबीच विश्वास, सहकार्य र दिगो आर्थिक स्थिरता निर्माणमा प्रभावकारी हुने उल्लेख गर्दै एनवाइइएफ जनकपुर च्याप्टरले आगामी दिनमा नियमितरूपमा यस्ता कार्यक्रम सञ्चालन गर्ने प्रतिबद्धता व्यक्त गरे।

कार्यक्रमले सहभागीहरूबाट प्राप्त सुझावको संक्षेप तयार गरी आगामी चरणमा थप सरोकारवालासँग परामर्श अघि बढाउने निर्णयसहित समापन गरिएको आयोजकले जनाएको छ।