जनकपुरधाम, १४ मंसिर । जनकपुर–ढल्केवर ६ लेन व्यापारिक राजमार्गअन्तर्गत धनुषाका तीन स्थानमा आकाशे पुल निर्माणको काम तीव्र गतिमा अगाडि बढाइएको छ ।

पैदल यात्रुहरूको बढ्दो चाप र सडक दुर्घटना न्यूनीकरण गर्ने उद्देश्यले सडक डिभिजन कार्यालय मुजेलियाले करिब १० करोड ५० लाख रुपैयाँ लागतमा तीन वटा आकाशे पुल निर्माण सुरु गरेको हो ।

सडक डिभिजन कार्यालय जनकपुरधामका इन्जिनियर उज्जवल झाका अनुसार लक्ष्मिनिया, महिला विकास चोक र सखुवा चोकमा एक महिनाअघि नै माटो खनिनेदेखि पिलर निर्माणसम्मको काम सुरु भइसकेको छ ।

‘पैदल यात्रीको उच्च भीड हुने ठाउँ भएकाले आकाशे पुल अत्यावश्यक थियो । काम समयमै पूरा गर्ने लक्ष्यका साथ निर्माण अघि बढाइएको छ,’ उनले भने ।

तीनवटै पुल फरक–फरक लागतमा निर्माण भइरहेको छ । लक्ष्मिनिया बजारमा ३ करोड ४२ लाख रुपैयाँ, क्षीरेश्वरनाथ नगरपालिकास्थित महिला विकास चोकमा ३ करोड ३५ लाख र सखुवा चोकमा ३ करोड ४५ लाख रुपैयाँमा आकाशे पुल बन्नेछ । चालु आर्थिक वर्षको असार मसान्तसम्म सबै काम सक्ने लक्ष्य रहेको कार्यालयले जनाएको छ ।

निर्माणाधीन सबै पुल ५.६ मिटर उचाइ, २९.४ मिटर लम्बाइ र ३ मिटर चौडाइका हुनेछन् । आकाशे पुल सञ्चालनमा आएपछि सडक क्रस गर्ने पैदल यात्रुलाई सहज हुने, भीडभाड कम हुने र दुर्घटना दरमा उल्लेख्य कमी आउने सडक डिभिजन कार्यालय मुजेलियाले विश्वास व्यक्त गरेको छ ।

स्थानीयवासीले आकाशे पुल निर्माणलाई स्वागत गर्दै अत्यधिक व्यस्त रहने जनकपुर–ढल्केवर सडकखण्डमा यसको उपयोगले शहरको सौन्दर्यकरणसँगै ट्राफिक व्यवस्थापनमा पनि मद्दत पुग्ने बताएका छन् ।