जनकपुरधाम, १४ मंसिर । जनकपुरधामका होटल तथा गेस्टहाउसहरूमा देहव्यापारसहित विभिन्न यौनजन्य अनैतिक क्रियाकलाप बढेको आरोप लगाउँदै स्थानीय बासिन्दाहरू पिडारी चोक क्षेत्रमा सडकमा उत्रिएका छन् ।

पिडारी चोक आसपासका बस्तीमा बसोबास गर्दै आएका स्थानीयले लामो समयदेखि होटल तथा लजहरूमा अवैध गतिविधि खुलेआम चलिरहेको भए पनि प्रहरी प्रशासन निष्क्रिय बसेको आरोप लगाएका छन् ।

उनीहरू विरोध जुलुस र नाराबाजीसहित सडकमा उत्रिँदै अनैतिक गतिविधि तत्काल रोक्न माग गरेका हुन् ।

विरोध प्रदर्शनमा सहभागी स्थानीयवासीले होटल तथा गेस्टहाउसहरूमा भइरहेका यस्ता कार्यले समाज, विशेषगरी बालबालिका र युवामा गम्भीर नकारात्मक प्रभाव परेको बताएका छन् ।

‘हाम्रा घर अगाडि नै यस्ता गतिविधि हुँदा वातावरण बिग्रिँदै गएको छ । प्रहरीलाई पटक पटक जानकारी दिँदा पनि ठोस कारबाही हुन सकेको छैन,’ एक स्थानीयवासीले भने ।

जनकनगर सोसाइटी पिडारीले देहव्यापारविरुद्ध जनचेतना अभियान सुरु गरेको घोषणा गर्दै धनुषा प्रहरीले यस्तो अवैध क्रियाकलापलाई संरक्षण गरेको जस्तो देखिने व्यवहार नदोहर्याउन चेतावनी दिएको छ ।

सोसाइटीले होटल तथा गेस्टहाउस सञ्चालकलाई तत्काल अनैतिक गतिविधि बन्द गराउन आग्रह गर्दै यदि सुधार भएन भने स्थानीयस्तरमै होटल बन्द गराउने बाध्यता आउनेछ भन्दै चेतावनीसमेत दिएको छ ।

स्थानीयहरूको दबाबसँगै होटल तथा गेस्टहाउसहरूको अनुगमन कडाइका साथ गर्नुपर्ने माग तीव्र बनेको छ । उनीहरूले जनकपुरधामलाई धार्मिक, सांस्कृतिक तथा पर्यटकीय केन्द्रका रूपमा सुरक्षित र मर्यादित बनाउन राज्य संयन्त्र सक्रिय हुनुपर्ने बताएका छन् ।

यस विषयमा प्रहरीले भने औपचारिक प्रतिक्रिया नदिए पनि आन्तरिक रूपमा निगरानी बढाउने तयारी भएको स्रोतले जनाएको छ ।

जनकपुरधाममा पछिल्लो समय लज र होटलहरूमा अनियमित गतिविधि बढ्दै गइरहेको गुनासो स्थानीय स्तरमा उठ्दै आएको छ ।