जनकपुरधाम, १२ मंसिर । गृहमन्त्री ओमप्रकाश अर्यालसँग मधेश प्रदेशकी गृह, सञ्चार तथा कानुन मन्त्री विमला अन्सारीले शान्ति सुरक्षा सम्बन्धी विषयमा शिष्टाचार भेटवार्ता गरेकी छन् ।

भेटमा मधेश प्रदेशको समग्र सुरक्षा स्थिति, अपराध नियन्त्रणका उपाय तथा संघ प्रदेश सुरक्षा समन्वयलाई थप प्रभावकारी बनाउने विषयमा विस्तृत छलफल भएको गृहमन्त्रालयले जनाएको छ ।

भेटका क्रममा गृहमन्त्री अर्यालले मधेश प्रदेशको सुरक्षा सुदृढीकरणमा केन्द्र सरकार पूर्ण रूपमा प्रतिबद्ध रहेको पुनः पुष्टि गर्दै संघीय र प्रदेश सरकारबीचको सहकार्यलाई अझ मजबुत बनाइने आश्वासन दिए ।

उनले तोकिएको समयमा निर्वाचन सम्पन्न गराउने सरकारको अटल प्रतिवद्धता पनि व्यक्त गरे ।

यसैगरी, प्रदेशको सुरक्षा संरचना सहज बनाउन प्रहरी समायोजन ऐन कार्यान्वयनको प्रक्रियालाई शीघ्रता दिने कुरा मन्त्री अर्यालले स्पष्ट पारेको गृहमन्त्रीको सचिवालयले जनाएको छ ।