बारा, १२ मंसिर । बाराको प्रसौनी गाउँपालिका–६ भलुहीस्थित किरण बिग्रेज नेपाल प्रालीमा कार्यरत मेनेजर रामकिशोर सिंहको अज्ञात समूहद्वारा निर्मम हत्या भएको घटनापछि स्थानीय क्षेत्र तनाबग्रस्त बनेको छ ।

सर्लाहीको धनकौल गाउँपालिका–२ निवासी ४२ वर्षीय सिंहको बिहीबार राति उद्योग परिसरमै घाँटी रेटेर हत्या गरिएको प्रारम्भिक अनुसन्धानबाट जनाएको छ ।

परिवारका अनुसार सिंह बिहीबार साँझ करिब ७ बजे वीरगञ्जबाट उद्योगतर्फ हिँडेका थिए । करिब ८ बजेतिर अज्ञात समूह उद्योगभित्र प्रवेश गरी पहिलो चरणमा सिसिटिभी क्यामेराका तार काटेको र त्यसपछि सिंहको घाँटी रेटेर हत्या गरेको अनुमान गरिएको छ ।

हत्यापछि शव उद्योग क्षेत्रबाट केही दूरी टाढा रहेको सानो खाडलमा फालिएको अवस्थामा शुक्रबार बिहान फेला परेको जिल्ला प्रहरी कार्यालय बाराले जनाएको छ ।

बिहान सूचना प्राप्त भएपछि प्रहरी टोली घटनास्थलमा पुगेर प्रारम्भिक मुचुल्का उठाउँदै विस्तृत अनुसन्धान सुरु गरेको जानकारी प्रहरी नायब उपरीक्षक तथा सूचना अधिकारी विजय राज पण्डितले दिए ।

उनका अनुसार घटनास्थलमा भेटिएका प्रारम्भिक तथ्यका आधारमा प्राविधिक तथा मानवीय दुवै पद्धतिबाट अनुसन्धानलाई तीव्र बनाइएको छ । कसले, किन र कसरी हत्या गर्यो भन्नेबारे प्रहरीले विभिन्न कोणबाट अनुसन्धान गरिरहेको छ ।

बारामा पछिल्लो समय ज्यानसम्बन्धी घटनामा वृद्धि हुँदै गएको प्रहरीले जनाएको छ । चालू आर्थिक वर्ष ८१/८२ को साउनदेखि कार्तिक मसान्तसम्म मात्र कर्तव्य ज्यान २, ज्यानसम्बन्धी २६ र ज्यान मार्ने उद्देश्यका २० मुद्दा दर्ता भइसकेका छन् ।

स्थानीयवासीले उद्योगमै योजनाबद्ध ढंगले गरिएको हत्या सुरक्षा व्यवस्थामाथिको गम्भीर प्रश्न भएको भन्दै दोषीलाई छिटो पक्राउ गरी कडा कारबाहीको माग गरेका छन् । प्रहरीले घटनालाई योजनाबद्ध आशङ्का गर्दै सबै पक्षबाट अनुसन्धान जारी राखेको बताएको छ ।