सिरहा, १२ मंसिर । सिरहा जिल्लामा प्रहरीले विशेष सूचनाका आधारमा सञ्चालन गरेको दुुई छुट्टाछुट्टै अभियानमा २४ घण्टाको अन्तरालमै ६ जनालाई नियन्त्रणमा लिएको छ ।

मिर्चैया र गोलबजार क्षेत्रमा गरिएको कारबाहीमा प्रहरीले प्रतिबन्धित लागुऔषध, डिजिटल तराजु, मोबाइल फोन र नगद रकम बरामद गरेको जनाएको छ ।

गोप्य सूचनाका आधारमा खटिएको टोलीले बिहीबार नरहा–३ चौहर्वा चौकमा शंकास्पद गतिविधि गरिरहेका चारजनालाई पक्राउ गरेको इलाका प्रहरी कार्यालय मिर्चैयाले जनाएको छ । उनीहरूको साथबाट ब्राउनसुगर जस्तै लाग्ने पदार्थ, डिजिटल तराजु तथा मोबाइल फोन बरामद भएको प्रहरीले बताएको छ ।

पक्राउ पर्नेहरूमा सर्लाहीका ३२ वर्षीय कृष्ण रिजाल, उदयपुरका २३ वर्षीय केदार कुमार मगर, १९ वर्षीय अर्थमान थापा र ३३ वर्षीय देवप्रसाद प्रसाई रहेका छन् । उनीहरूलाई थप अनुसन्धानका लागि मिर्चैया प्रहरी कार्यालयमै राखिएको छ ।

यस्तै, गोलबजारमा गरिएको अर्को कारबाहीमा प्रहरीले गोलबजार–६ हटियाबजार क्षेत्रमा लागुऔषध कारोबार भइरहेको सूचनाका आधारमा छापा मार्दै दुईजनालाई नियन्त्रणमा लिएको हो । उनीहरूका साथबाट हिरोइन जस्तै लाग्ने पदार्थ र नगद समेत फेला परेको प्रहरीले जानकारी दिएको छ । पक्राउ पर्नेमा समिर लहेरी र राजन विश्वकर्मा रहेका छन् ।

दुवै घटनामा पक्राउ पदेहरूविरुद्ध लागुऔषधसम्बन्धी कसुरअन्तर्गत आवश्यक कानुनी प्रक्रिया अघि बढाइएको जिल्ला प्रहरी कार्यालय सिरहाका सूचना अधिकारी रमेश बहादुर पालले जानकारी दिएका छन् ।