जनकपुरधाम, १२ मंसिर । देशको राजनीतिक वातावरण जटिल र चिन्ताजनक दिशातर्फ मोडिँदै गइरहेको बेला तराई मधेश लोकतान्त्रिक पार्टी (तमलोपा) ले वर्तमान परिस्थितिबाट प्रतिगमनकारी शक्तिहरू लाभ उठाउन खोजिरहेको आरोप लगाएको छ ।

पार्टीका केन्द्रीय अध्यक्ष बृषेशचन्द्र लालले जारी गरेको विज्ञप्तिमा देशलाई स्थिरता, विधिको शासन र लोकतान्त्रिक मार्गमा फर्काउने एक मात्र उपाय कानूनी राज्यको दृढ प्रतिष्ठापन भएको उल्लेख छ ।

पार्टीका अनुसार अहिलेको अस्थिर र बेथितिपूर्ण राजनीतिक अवस्थाले जनताको निराशा बढाएको छ । त्यसको दुरुपयोग गर्दै केही प्रतिक्रियावादी समूहहरूले सङ्घीय लोकतान्त्रिक गणतन्त्रविरुद्ध षड्यन्त्र चलाइरहेको पार्टीको दाबी छ । विज्ञप्तिमा भनिएको छ, ‘देशमा विद्यमान बेथितिको परिस्थितिबाट केही तत्वहरू अराजकता फैलाउँदै जनसत्ता कमजोर पार्ने प्रयासमा छन् । यसले सङ्घीय गणतन्त्रलाई नै लक्षित गरेको छ ।’

तमलोपाले जारी गरेको वक्तव्यमा विशेषतः मधेश, थरुहट तथा आदिवासी जनजातिहरूको पहिचान, समानता र नागरिक अधिकारका पक्षमा संघर्ष गर्दै आएका शक्तिहरूलाई लक्षित गर्दै षड्यन्त्र भइरहेको आरोप लगाइएको छ ।

विज्ञप्तिमा वर्तमान चुनौतीको समाधानका लागि मधेश, थरुहट, आदिवासी जनजाति तथा संघीयतावादी राजनीतिक समूहबीच अझ प्रस्ट संवाद र ऐक्यबद्धताको आवश्यकता रहेको उल्लेख छ । अध्यक्ष लालले संघीयतावादी शक्तिहरूसँग सार्थक संवाद र सहकार्यको अपील गर्दै साझा मुद्दाहरूमा एक स्वरमा उभिन आग्रह गरेका छन् ।

तमलोपाले आगामी फागुन २१ मा निर्धारित आमचुनावलाई राजनीतिक अस्थिरता तथा बेथितिबाट निस्कने सबैभन्दा व्यवहारिक र लोकतान्त्रिक मार्गको रूपमा व्याख्या गरेको छ । पार्टीको भनाइमा आवधिक निर्वाचन लोकतन्त्रको मेरुदण्ड हो । र, आवश्यक परे जनादेशमा जाने संस्कार कायम राख्नु नै स्थायी समाधान हो ।

विज्ञप्तिमा उल्लेख छ, ‘देशको पहिलो प्राथमिकता कानूनी राज्यको पुनःस्थापना हो । जनताको सर्वोच्चता, सङ्घीय गणतन्त्र र लोकतान्त्रिक शासनप्रणालीप्रति हाम्रो अडान दृढ छ । यसमा कुनै प्रकारको सम्झौता अस्वीकार्य छ ।’

पार्टीले वर्तमान राजनीतिक अस्तव्यस्तताको जडमा रहेको प्रमुख समस्या ‘भ्रष्टाचार र बेथिति’ भएको दाबी गर्दै यसको अन्त्य नगरेसम्म देशले स्थिरता प्राप्त गर्न नसक्ने बताएको छ । ‘भ्रष्टाचारविरुद्ध कठोर कदम र विधिको शासनको पुनस्र्थापना नगरेसम्म देश सहज अवस्थामा फर्किन सक्दैन,’ विज्ञप्तिमा उल्लेख छ ।