जनकपुरधाम, १२ मंसिर । मधेश प्रदेशसभाका तत्कालीन सभामुख रामचन्द्र मण्डलविरुद्ध दर्ता गरिएको पद तथा आचरणविरुद्धको प्रस्तावका क्रममा उत्पन्न तनावपछि सचिवालयले १३ जना करार कर्मचारीलाई पदमुक्त गरेको छ ।

प्रतिपक्षी सातदलीय गठबन्धनले प्रक्रियागत अवरोध सिर्जना गर्ने र सांसदहरूमाथि हातपातमा संलग्न भएको आरोपमा उनीहरूलाई कारबाही गरेको हो ।

उपसभामुख बबिता कुमारी राउत ईशरले प्रस्ताव दर्ता गर्ने दिन प्रतिपक्षी सांसदमाथि हातपात र शारीरिक दुर्व्यवहार गर्ने घटनामा तत्कालीन सभामुखलाई सहयोग गरेका कर्मचारी पहिचान गरी बर्खास्त गरिएको बताइन् ।

‘सभामुखको निजी सचिवालयबाहेकका करार कर्मचारीलाई हटाइएको छ । प्रक्रियागत अराजकता फैलाउने र असंवैधानिक गतिविधिमा समर्थन गर्नेहरूमाथि कारबाही गरिएको हो,’ उनले भनिन् ।

सचिवालय स्रोतका अनुसार तत्कालीन सभामुख मण्डलका प्रमुख स्वकीय सचिव, उनका नातेदार रमेश मण्डल, स्वकीय सचिव धिरेन्द्र मण्डल, सतिश साह, कम्प्युटर अपरेटरलगायतका करार कर्मचारी सभामुखको राजीनामा आएसँगै स्वयम् पदमुक्त भएका हुन् । यस्तै कार्यालय सहयोगी दीपक मण्डल, विश्वनाथ यादव र एक चालकसहित कुल १३ जना करार कर्मचारीलाई हटाइएको पुष्टि गरिएको छ ।

यसैबीच, ४–५ जनामाथि थप अनुसन्धान भइरहेको उपसभामुख राउतले जानकारी दिएकी छन् । स्थायी दरबन्दीमा रहेका पाँच कर्मचारीबाट आधिकारिक स्पष्टीकरण मागिएको छ । स्पष्टीकरण सोधिएका कर्मचारीमा सचिव होमनाथ पहाडी, उपसचिव विपिन ठाकुर, उपसचिव सुरेन्द्र कुमार कर्ण, कानुन अधिकृत अञ्जुकुमारी न्यौपाने र नासु विजेन्द्र यादव छन् ।

उपसभामुख राउतका अनुसार प्रस्ताव दर्तादेखि पूर्वसभामुखको राजीनामा प्रक्रियासम्म देखा परेका विवादास्पद गतिविधि, संसदीय मर्यादा उल्लंघन र प्रतिपक्षमाथि बलप्रयोगमा संलग्नताको आधारमा कारबाही अघि बढाइएको हो ।

‘सभामुख पदमा नरहेपछि उनका स्वकीय रूपमा काम गर्ने व्यक्तिहरू स्वयम् पदबाट हटिनुपर्ने हो । तर, अनेक विवादास्पद काममा संलग्न भएको देखिएकाले सचिवालयलाई कदम चाल्नै परेको हो,’ उनले स्पष्ट पारिन् ।

अब सातदलीय गठबन्धनको बैठक बसेर थप कदमको रूपरेखा तय गरिने र आवश्यकता परे अन्य कर्मचारीमाथि पनि अनुशासनात्मक प्रक्रिया अघि बढाइने उपसभामुख राउतले बताइन् ।