जनकपुरधाम, १२ मंसिर । जनता समाजवादी पार्टी (जसपा) नेपालको पार्टी स्कुल तथा प्रशिक्षण विभागले आयोजना गरेको तीनदिने प्रदेशस्तरीय प्रशिक्षण कार्यक्रम शुक्रबार सम्पन्न भएको छ ।

कार्यक्रममा पार्टी अध्यक्ष तथा समाजवादी नेता उपेन्द्र यादव मुख्य प्रशिक्षकका रूपमा उपस्थित रहेर नेपालका राजनीतिक शक्तिको तुलनात्मक अध्ययन, जसपाको नीति–सिद्धान्त र नेतृत्व विकासका विषयमा विस्तृत प्रशिक्षण दिएका छन् ।

अध्यक्ष यादवले देशको वर्तमान राजनीतिक अवस्था, दलहरूको वैचारिक दिशा, शक्ति सन्तुलन, संघीयता र गणतन्त्रको वर्तमान स्वरूपबारे प्रशिक्षार्थीहरूलाई अवगत गराउँदै समसामयिक चुनौती तथा समाधानका मार्गमा विस्तृत व्याख्या गरेका थिए । उनले संघीय संरचना प्रभावकारी बनाउन सकिने उपायदेखि राष्ट्रिय राजनीतिक स्थिरताको पक्षमा बलियो संगठन र सक्षम नेतृत्व अपरिहार्य रहेकोमा जोड दिए ।

कार्यक्रममा प्रशिक्षकका रूपमा सहभागी राजनीतिक विश्लेषक जय निशान्तले डिजिटल युगमा कृत्रिम बुद्धिमत्ता (एआई) तथा सामाजिक सञ्जालको प्रभावकारी प्रयोग, नेतृत्व विकासका नयाँ विधि तथा वर्तमान राजनीतिक घटनाक्रमअनुसार चुनाव व्यवस्थापनका महत्वपूर्ण पक्षबारे प्रशिक्षणार्थीहरूलाई मार्गदर्शन दिएका थिए ।

त्यसैगरी अर्थशास्त्री डा. उमा शंकर प्रसाद साहले नेपालको अर्थतन्त्रको वर्तमान अवस्थाबारे प्राविधिक प्रस्तुति दिँदै संघ र प्रदेश सरकारहरूलाई हुने वित्तीय हस्तान्तरणमा देखिने विभेद र यसको प्रभावबारे सहभागीहरूलाई विस्तृत जानकारी गराए ।

प्रशिक्षण कार्यक्रममा मधेश प्रदेशसभाका सांसदहरूदेखि जसपाका विभिन्न तहका पदाधिकारी तथा कार्यकर्तासम्मको उल्लेखनीय उपस्थिति रहेको पार्टी स्कुल तथा प्रशिक्षण विभागका प्रमुख सुरेश मण्डलले जानकारी दिए । उनका अनुसार यस्ता आयोजनाले संगठन बलियो बनाउन र नेताहरूको क्षमता अभिवृद्धि गर्न महत्वपूर्ण भूमिका खेल्नेछ ।