जनकपुरधाम, ११ मंसिर । विवाहपञ्चमी महोत्सव सम्पन्न भएपछि मनाइने चतुर्थी (चौठारी) को परम्परा अनुसार बिहीबार राम मन्दिरबाट जानकी मन्दिरमा ‘भार’ पठाइएको छ ।

राम मन्दिरका महन्थ राम गिरीको नेतृत्वमा सैकडौँ भक्तजन सहभागी भई मिठाइ, फलफूल तथा अन्य प्रसादसहितको सामग्री जानकी मन्दिरमा पहुँचाइएको हो ।

विवाहपञ्चमीको ऐतिहासिक र सांस्कृतिक महत्त्व झल्काउने यो ‘भार’ प्रेषण संस्कारलाई रामजानकीबीचको दिव्य सम्बन्धको रूपमा लिइन्छ ।

बिहानैदेखि जुटेको टोली पारम्परिक बाजागाजासहित जानकी मन्दिरतर्फ पदयात्रा गर्दै अघि बढ्दा जनकपुरधामका गल्ली र चौकहरू उत्सवमय बनेका थिए ।

महन्थ गिरीले यो परम्परा वर्षौँदेखि निरन्तर चल्दै आएको बताउँदै भने, ‘रामजानकीको पवित्र बन्धनलाई स्मरण गर्दै चतुर्थीको दिन ‘भार’ लैजाने चलन जनकपुरधामको सांस्कृतिक पहिचान हो । यसले दुवै मन्दिरबीचको धार्मिक सम्वन्ध झनै प्रगाढ बनाउँछ ।’

जानकी मन्दिर परिसरमा पुगेपछि वैदिक विधिअनुसार पूजापाठ गरी प्रसाद वितरण गरिएको थियो । भक्तजनले यसलाई विवाहपञ्चमी उत्सवको अविस्मरणीय र भावनात्मक समापनका रूपमा अनुभूति गरेका छन् ।