जनकपुरधाम, ११ मंसिर । राष्ट्रिय प्रजातन्त्र पार्टी (राप्रपा) ले पार्टी अनुशासन उल्लङ्घन गरेको आरोपमा मधेश प्रदेश सभा सदस्य कञ्चन विच्छालाई ६ महिनाका लागि साधारण सदस्यबाट निलम्बन गरेको छ ।

बिहीबार बसेको केन्द्रीय कार्य सम्पादन समितिको बैठकले केन्द्रीय अनुशासन समितिको सिफारिसअनुसार विच्छामाथि कारबाही गर्दै तत्काल प्रभावबाट निलम्बन गर्ने निर्णय गरेको प्रवक्ता तथा प्रचार विभाग प्रमुख मोहनकुमार श्रेष्ठले जानकारी दिए ।

श्रेष्ठका अनुसार पार्टीको निर्देशन अवज्ञा गर्दै सरकारमा सहभागी हुने प्रक्रियामा विच्छाले पार्टीको आधिकारिक लाइन उल्लङ्घन गरेकी थिइन् । यही कारण राप्रपाले उनलाई मधेश प्रदेश सभा सदस्यबाटसमेत फिर्ता बोलाउने निर्णय गरेको छ ।

मधेश प्रदेशका मुख्यमन्त्री सरोजकुमार यादवले ८ मंसिरमा कञ्चन विच्छालाई वन तथा वातावरण मन्त्रालयको जिम्मेवारी दिएका थिए । पार्टीको अनुमतिबिना सरकारमा सहभागी भएको आरोपपछि उनीमाथि अनुशासनात्मक प्रक्रिया अघि बढाइएको हो ।

यसअघि २४ कार्तिकमा मुख्यमन्त्री यादवले तीन जना सांसदलाई विना विभागीय मन्त्री नियुक्त गरेका थिए । त्यसपछि प्रदेश सरकारको सत्ता समिकरणमा नयाँ तरंग सिर्जना भएको थियो ।