जनकपुरधाम, ११ मंसिर । कमला नगरपालिकामा पोखरी सौन्दर्यकरणको ठेक्कापट्टा प्रक्रियामा व्यापक अनियमितता भएको ठहर गर्दै अख्तियार दुरुपयोग अनुसन्धान आयोगले पूर्वमेयर राम उद्गार गोइतसहित १० जनाविरुद्ध विशेष अदालतमा भ्रष्टाचार मुद्दा दायर गरेको छ ।

अख्तियारका अनुसार धनुषाको कमला नगरपालिका–३ लग्मा बजार नजिकको पोखरी सौन्दर्यकरण योजनामा कम रकम कबोल गर्ने निर्माण व्यवसायीलाई योजनाबद्धरुपमा पन्छाएर उच्च रकम कबोल गर्ने कम्पनीलाई ठेक्का दिइएको प्रमाणित भएपछि मुद्दा दायर गरिएको हो ।

आर्थिक वर्ष २०७६÷०७७ मा कमला नगरपालिकाले आह्वान गरेको बोलपत्रमा ‘सेट स्क्वायर कन्सट्रक्सन प्रालि’ ले सबैभन्दा कम ४२ लाख ७४ हजार ५५१ रुपैयाँ कबोल गरेको थियो । तर, अनुसन्धानमा नगरपालिकाका पदाधिकारी र कर्मचारीको मिलेमतोमा उक्त कम्पनीका सम्झौता निवेदन, बैंक ग्यारेन्टीसहितका कागजात लुकाएर नष्ट गरिएको खुलेको अख्तियारका प्रवक्ता राजेन्द्रकुमार पौडेलले जानकारी दिएका छन् ।

अख्तियारका अनुसार सबैभन्दा कम रकम कबोल गर्ने कम्पनीलाई कालोसूचीमा समेत नराखी केवल बिड बोन्ड मात्र जफत गरियो । त्यसपछि दोस्रो उच्च रकम कबोल गर्ने ‘इन्फ्रास्ट्रक्चर एस एण्ड बी बिल्डर्स प्रालि’ लाई ७२ लाख २१ हजार ७३० रुपैयाँमा ठेक्का दिइएको पाइएको छ ।
उक्त अनियमित प्रक्रियाका कारण कमला नगरपालिकालाई २९ लाख ४४ हजार १३७ रुपैयाँ नोक्सान पुगेको अख्तियारको ठहर छ ।

अख्तियारले दायर गरेको मुद्दामा पूर्वमेयर राम उद्गार गोइत, तत्कालीन निमित्त प्रमुख प्रशासकीय अधिकृत वीरेन्द्रकुमार सढान, लेखापाल सञ्जीवकुमार महतो, जिन्सी शाखा प्रमुख जुगलकिशोर यादवसहित कार्यपालिका सदस्यहरू धनेश्वर यादव, धर्मनाथ मण्डल, पल्टु कवारी, विनोद राम, समसुल मिया मोमिन र ठेकेदार कम्पनी ‘इन्फ्रास्ट्रक्चर एस एण्ड बी बिल्डर्स प्रालि’ समावेश छन् ।

अख्तियारले भ्रष्टाचार निवारण ऐन, २०५९ को दफा १७ बमोजिम उनीहरूले भ्रष्टाचारसम्बन्धी कसुर गरेको ठहर गर्दै प्रत्येक व्यक्तिमा २९ लाख ४४ हजार १३७ रुपैयाँ बिगो कायम गरी सोही बराबरको जरिवाना र कैद सजायको माग दाबी गरेको छ ।

त्यसैगरी, तत्कालीन मेयर गोइतविरुद्ध दफा २४ बमोजिम ‘पद दुरुपयोग गरी भ्रष्टाचार गर्न सहयोग उपलब्ध गराएको’ आरोपमा थप सजायसमेत माग गरिएको प्रवक्ताले जनाएका छन् ।