पर्सा, ११ मंसिर । चालु आर्थिक वर्षको पहिलो चार महिनामा वीरगञ्ज नाका हुँदै भएको निर्यातमा उल्लेखनीय वृद्धि भएको छ ।

वीरगञ्ज भन्सार कार्यालयका अनुसार यो अवधिमा कुल ३३ अर्ब २१ करोड बराबरका उत्पादन विदेशिएका छन् ।

गत आर्थिक वर्षको सोही अवधिमा मात्र निर्यात रकम १३ अर्ब ६४ करोड थियो । यसले गर्दा यो वर्ष निर्यातमा दुई गुणाभन्दा बढी वृद्धि भएको भन्सार प्रमुख विष्णुप्रसाद ज्ञवालीले बताएका छन् ।

उनका अनुसार निर्यात भएका वस्तुहरूमा भटमासको तेल अग्रस्थानमा रहेको छ । चालु अवधिमा मात्र १७ अर्ब ३२ करोड बराबरको भटमास तेल विदेशिएको छ ।

त्यस्तै, फलफूलको जुस पनि प्रमुख निर्यात वस्तु बनेको छ । यसको मात्रा २ अर्ब ६० करोड बराबर रहेको छ ।