जनकपुरधाम, ११ मंसिर । जनकपुरधाम उपमहानगरपालिका–२२ ले बसबिट्टी क्षेत्रमा लामो समयदेखि लागू हर्न निषेधसम्बन्धी निर्णयलाई थप कडाइका साथ कार्यान्वयन गर्ने घोषणा गरेको छ ।

बिहीबार वडा अध्यक्ष विमलेश मिश्रको अध्यक्षतामा बसेको वडा समितिको बैठकले ध्वनि प्रदूषण नियन्त्रण र सामाजिक वातावरण समुचित राख्ने उद्देश्यसहित हर्न व्यवस्थापन सम्बन्धी महत्वपूर्ण निर्णयहरू सर्वसम्मतिमा पारित गरेको हो ।

वडा अध्यक्ष मिश्र, वडा सदस्यहरू कुलदिप मुखिया, पूनम देवी सहनी, संजिव मुखिया, सम्पत्त देवी, सुरेश मण्डल, शिवशंकर मिश्र, अमरेन्द्र मण्डल, मुकेश ठाकुर तथा इशराइल राईन लगायतको उपस्थितिमा सम्पन्न बैठकले व्यक्तिगत तथा सामुदायिक कार्यमा साउण्ड व्यवस्थापनको विषयलाई प्राथमिकताका साथ उठाइएको छ ।

बैठकले विवाह, उपनयन, पूजापाठ, गृहप्रवेश जस्ता पारिवारिक कार्यक्रममा हर्न बजाउने प्रचलनलाई पूर्ण रूपमा रोक्न निर्णय गरेको छ । पूर्वकै निर्णयअनुसार बसत्रिट्टी क्षेत्र ‘नो–हर्न जोन’ घोषित गरिएको भए पनि पछिल्लो समय यसको उल्लङ्घन हुने प्रवृत्ति देखिएपछि यसलाई कडाइका साथ लागू गर्नुपर्ने आवश्यकता परेको बैठकले जनाएको छ ।

वडाअध्यक्ष मिश्रले भने, ‘ध्वनि प्रदूषणले बालबालिका, वृद्ध तथा बिरामीमा प्रतिकूल प्रभाव परिरहेको छ । सामाजिक संस्कार, अनुष्ठान पनि मर्यादाभित्र हुनुपर्छ ।’ उनले जनसहभागितासहितको वातावरणमैत्री अभियान अघि बढाइने बताए।

बैठकले विशेष परिस्थितिमा आयोजना हुने धार्मिक अनुष्ठान, मेला–महोत्सव वा सामुदायिक कार्यक्रमका लागि ‘सामान्य’ र ‘मर्यादित’ ध्वनि प्रयोगलाई अनुमति दिन सकिने निर्णय गरेको छ । सो अवस्थामा समेत स्थानीय वातावरण, विद्यालय क्षेत्रमा पर्न सक्ने प्रभाव र राति अवेरसम्म ध्वनि प्रदूषण नहुने गरी सावधानी अपनाइने उल्लेख छ ।

उपस्थित लाइट एण्ड साउण्ड सेवा प्रदायकहरूसँगको छलफलपछि उनीहरूले पनि यो निर्णयलाई सहर्ष स्वीकार गरेको बैठकको निष्कर्षमा उल्लेख गरिएको छ । अन्य क्षेत्रबाट साउण्ड वा बाजा ल्याई बढी आवाज गर्ने कार्यलाई समेत पूर्ण निषेध गरिनेछ ।

यस ‘नो–हर्न नीति’को अवज्ञा गरिएमा आयोजक तथा साउण्ड सञ्चालनकर्ता दुवै पक्षलाई कानूनबमोजिम कारबाही गरिनेछ । वडा कार्यालयले नागरिक समाज, टोल विकास संस्था तथा स्थानीय प्रहरीलाई समेत निगरानी र सूचना दिन आग्रह गरेको छ ।