जनकपुरधाम, ११ मंसिर । धनुषाको नगराईन नगरपालिकाले द रेयुकाई मासु नागा आँखा अस्पताल ढल्केवरको सहकार्यमा निःशुल्क आँखा शिविर सञ्चालन गर्ने भएको छ ।

नगरपालिकाको आयोजनामा सञ्चालन हुने यो शिविरमार्फत मोतिबिन्दुको स्क्रिनिङ, आँखा सम्बन्धी अन्य रोगहरूको परीक्षण तथा आवश्यक परे शल्यक्रियासम्म निःशुल्क उपलब्ध गराइने नगरपालिकाले जनाएको छ ।

स्वास्थ्य संस्था तथा विद्यालयमार्फत आवश्यक प्रचारप्रसार गरी आँखाका समस्या भएका नागरिकलाई सहभागिताका लागि आग्रह गरिएको छ । प्रत्येक शिविर दिनको बिहान १० बजेबाट सुरू हुने जनाइएको छ ।

नगरपालिकाका अनुसार मोतिबिन्दु पुष्टि भएका बिरामीका लागि शल्यक्रिया तथा यातायात सुविधा समेत पूर्ण रूपमा निःशुल्क उपलब्ध गराइनेछ । विद्यालयहरूलाई आवश्यक सहयोग र समन्वय गर्न समेत अनुरोध गरिएको छ ।

नगराईन नगरपालिकाले स्थानीय नागरिकलाई आँखाको स्वास्थ्यप्रति संवेदनशील रहन आग्रह गर्दै शिविरमा उपस्थित भई निःशुल्क सेवा लिन अनुरोध गरेको छ ।