महोत्तरी, ११ मंसिर । नागरिक सरोकारका मुद्दामा सक्रिय महोत्तरीका जेनजी युवाहरूले बिहीबार प्रमुख जिल्ला अधिकारी इन्द्रदेव यादव र प्रादेशिक अस्पताल जलेश्वरका निमित्त प्रमुख डा. विकासकुमार साहलाई छुट्टाछुट्टै ११ बुँदे ज्ञापनपत्र बुझाएका छन् ।

स्थानीय तह तथा सेवा सुविधामा देखिएका समस्या समाधान गर्न दबाबमूलक पहल थालेका युवाहरूले फोहर व्यवस्थापनदेखि सार्वजनिक पारदर्शितासम्मका विषय उठाएका हुन् ।

जलेश्वर नगरपालिका र प्रादेशिक अस्पताल परिसरमा देखिएको अव्यवस्था, फोहर समस्या, मणिपाल जग्गा प्रकरणमा पारदर्शिता, सार्वजनिक सरोकारका मुद्दा समाधान, हाटबजार ठेक्का प्रक्रियामा देखिएको अपारदर्शिता तथा सडक मर्मतमा बेवास्तालगायतका विषयहरू समेटेर युवाहरूले अधिकारप्रति सजगता देखाएका छन् ।

ज्ञापनपत्र बुझ्दै सिडिओ यादवले उठाइएका मुद्दा सम्बन्धित निकायमा पठाइने तथा आवश्यक समन्वय गरिने आश्वासन दिए।

त्यस्तै, प्रादेशिक अस्पतालका निमित्त प्रमुख डा. साहले अस्पतालमा सुधारका काम क्रमिक रूपमा भइरहेको उल्लेख गर्दै युवाहरूले माग गरेका विषय सम्भव भएसम्म कार्यान्वयनमा ल्याइने बताए ।

स्थानीय विकास र सुशासनका मुद्दामा युवाहरूको सक्रियता बढ्दै जानुले सकारात्मक प्रभाव पार्ने विश्वास गरिएको छ।