जनकपुरधाम, ११ मंसिर । जनता समाजवादी पार्टी (जसपा) मधेश प्रदेशका अध्यक्ष अशोककुमार यादवले पार्टी अध्यक्षसमक्ष साधारण सदस्यता समेत त्याग्दै पदबाट राजीनामा दिएका छन् ।

लामो समयदेखि मधेशी आन्दोलन र अधिकारका मुद्दामा सक्रिय रहेका यादवले वर्तमान राजनीतिक परिवेशमा मधेश केन्द्रित दलहरूले विकास र अधिकारको रक्षा गर्न नसक्ने ठहर गर्दै पार्टी छाडेको घोषणा गरेका हुन् ।

यादवले बुझाएको राजीनामा पत्रमा आफूले मधेशी जनअधिकार फोरम नेपालबाट सुरु गरेको राजनीतिक यात्रा जसपासम्म आइपुग्दा निरन्तर अन्याय, अत्याचार, शोषण र विभेदका विरुद्ध आवाज उठाउँदै थुनामामिलादेखि जेलसम्मको कठिनाइ भोगेको उल्लेख गरेका छन् ।

उनले लेखेका छन्, ‘म आज मितिबाट सम्हाल्दै आएको पार्टीको जिम्मेवारी तथा पार्टीको साधारण सदस्य समेतबाट राजीनामा गर्दछु ।’

यससँगै जसपाभित्र नयाँ राजनीतिक उथलपुथल पनि देखिएको छ । पार्टीका उपाध्यक्ष राजेन्द्र श्रेष्ठसहित केही शीर्ष नेताहरू आजै नेपाली कम्युनिस्ट पार्टी (नेकपा)मा प्रवेश गर्ने तयारीमा रहेको स्रोतले जनाएको छ ।

पार्टीभित्रको असन्तुष्टि र नेतृत्वप्रति गहिरो अविश्वासबीच आएको यादवको राजीनामा जसपाका लागि थप चुनौतीका रूपमा हेरिएको छ ।