जनकपुरधाम, १० मंसिर । विवाहपञ्चमीको अवसरमा जानकी मन्दिरले पहिलो पटक २१ जना सरसफाइकर्मीलाई विशेष सम्मान प्रदान गरेको छ ।

सम्मान पत्र र पुरस्कार पूर्वउपप्रधानमन्त्री तथा गृहमन्त्री विमलेन्द्र निधिको हातबाट मन्दिर प्राङ्गणमा बनाइएको विवाह मञ्चमा प्रदान गरिएको हो ।

जानकी मन्दिरका उत्तराधिकारी महन्थ रामरोशन दासले यस वर्षदेखि प्रत्येक वर्ष यसरी सरसफाइकर्मीलाई सम्मान दिने निर्णय भएको जानकारी दिए । मन्दिरले जानकपुरधामको सरसफाइका लागि अहोरात्र खटिएका यी कर्मवीरहरुलाई सम्मानित गरेको हो ।

सम्मान वितरण कार्यक्रममा सहभागी भएका नेता निधिले यस सम्मानलाई भेदभावमुक्त समाज निर्माणको दिशामा महत्वपूर्ण कदमको रूपमा हेरिएको बताए । उनले भने, ‘समानता र समान अवसरका लागि यो पुरस्कार एउटा प्रेरणा बन्नेछ ।’

मन्दिरले सीताराम विवाह महोत्सवको अन्तिम दिन रामकलेवाको दिनलाई लक्षित गर्दै समाजमा समानता र परस्पर सम्मानको सन्देश फैलाउने उद्देश्य राखेको छ ।