जनकपुरधाम, १० मंसिर । जिल्ला प्रहरी कार्यालय धनुषाले सीताराम विवाहपञ्चमीको मेला भर्न आएका श्रद्धालुहरूको साथबाट चोरी र पाकेटमारीको घटनामा संलग्न रहेको आरोपमा ६३ जनालाई पक्राउ गरेको छ । पक्राउ परेकाहरूमा ३७ भारतीय र २६ नेपाली नागरिक रहेका छन् ।

प्रहरीले जनकपुरधामका विभिन्न स्थानहरूबाट ५० पुरुष र १३ महिला सहित ६३ जना संलग्न व्यक्तिहरूलाई नियन्त्रणमा लिएको जानकारी दिएको छ । उनीहरूविरुद्ध चोरी, पाकेटमारी र लुटपाटका घटनामा संलग्न रहेको आरोप छ ।

प्रहरीले पक्राउ गरिएका व्यक्तिहरूको साथबाट नगद १ लाख २७ हजार ८४ रूपैयाँ, १५ थान मोबाइल फोन, १२ थान मंगलसुत्र र अन्य सुन जस्तो गरगहना, तथा तीन थान चाँदीको अंगुठी बरामद गरेको छ ।

धनुषाका प्रहरी प्रमुख रुगम बहादुर कुँवरले मेलामा भीडभाडको फाइदा उठाएर यस्ता अपराधिक क्रियाकलापहरू बढेको र यसबारे गम्भीर अनुसन्धान भइरहेको बताएका छन् ।