जनकपुरधाम, १० मंसिर । जनता समाजवादी पार्टी (जसपा) नेपालले बुधबार जनकपुरधाममा प्रदेश स्तरीय प्रशिक्षण कार्यक्रमको औपचारिक उद्घाटन गरेको छ ।

पार्टीको स्कुल र प्रशिक्षण विभागद्वारा आयोजना गरिएको उक्त कार्यक्रमको उद्घाटन जसपा नेपालका राष्ट्रिय अध्यक्ष उपेन्द्र यादवले गमलामा पानी हालेर गरेका छन् ।

उद्घाटन समारोहमा बोल्दै अध्यक्ष यादवले पार्टीलाई सशक्त विचार, नीति र संगठनात्मक सबलतासाथ अघि बढाउनका लागि यस्ता प्रशिक्षण कार्यक्रम अत्यन्त आवश्यक रहेको बताए । उनले यो अवसरलाई पार्टीका नेता र कार्यकर्ताहरूको क्षमता विकास गर्ने महत्वपूर्ण कदमको रुपमा प्रस्तुत गरे ।

कार्यक्रममा प्रदेशका विभिन्न स्थानबाट आएका जसपाका नेताहरू र कार्यकर्ताहरूको सक्रिय सहभागिता रहेको छ । जसपाका वरिष्ठ नेताहरू, प्रशिक्षकहरू र स्थानीय प्रतिनिधिहरूको उपस्थितिमा कार्यक्रमको शुभारम्भ भएको हो ।

तिन दिनसम्म चल्ने यो प्रशिक्षण कार्यक्रमले पार्टीका सदस्यहरूलाई विचार, संगठन र रणनीतिक दृष्टिकोणमा दक्ष बनाउन लक्ष्य राखेको जनाइएको छ ।