जनकपुरधाम, १० मंसिर । मिथिलाको सांस्कृतिक पहिचान झल्काउने सप्ताहव्यापी सीताराम विवाहपञ्चमी महोत्सवको मूल अनुष्ठान रामकलेवाका साथ आज सम्पन्न भएको छ ।

विवाहपञ्चमीको अन्तिम दिन जन्तीका रूपमा आएका साधुसन्तलाई ५६ प्रकारका व्यञ्जन तथा मिष्ठान्न खुवाएर बिदाइ गर्ने परम्परानुसार आज रामकलेवा मनाइएको हो ।

यसअघि मंगलबार दिउँसो जनकपुरधामको रंगभूमि मैदानमा सम्पन्न रामसीताको स्वयम्बरपश्चात् राति १० बजेसम्म मन्दिर परिसरमा वैवाहिक कार्यक्रम आयोजना गरिएको थियो ।

बालबालिकालाई प्रतिकात्मक रूपमा राम, लक्ष्मण, भरत र शत्रुधनको रूपमा तयार गरिँदै साधुसन्तलाई दान–दक्षिणासहित सम्मानपूर्वक बिदाइ गरिएपछि महोत्सवको विधिवत समापन भएको जानकी मन्दिरका सहायक महन्थ रामरोशन दासले जानकारी दिए ।

रामकलेवामा सहभागी नेपाली कांग्रेसका नेता विमलेन्द्र निधिले अयोध्या र अन्य स्थानबाट आएका जन्ती रूपी साधु सन्त र महन्तहरुलाई भोजन गराउनु आफ्नो लागि सौभाग्य रहेको बताए । नेपाल सरकारका पूर्वउपप्रधान तथा गृहमन्त्रीसमेत रहेका नेता निधिले भने, ‘रामकलेवाको समय उपस्थिति हुनु भनेको मेरो सौभाग्य हो ।’

मंसिर ४ गतेदेखि सुरु भएको सप्ताहव्यापी महोत्सव विभिन्न सांस्कृतिक कार्यक्रमका कारण झनै आकर्षक बनेको थियो । पहिलो दिन नगरदर्शन, दोस्रो दिन फूलबारी लिला, तेस्रो दिन धनुषा यज्ञ, चौथो दिन तिलकोत्सव, पाँचौँ दिन मटकोर तथा छैटौँ दिन विवाहपञ्चमी मुख्य आकर्षण बने ।

स्थानीयवासी, साधुसन्त तथा देश विदेशबाट आएका भक्तजनको सहभागितामा मनाइएको यस वर्षको विवाहपञ्चमी महोत्सवले मिथिला संस्कृतिको समृद्ध इतिहास र धार्मिक परम्परालाई फेरि एकपटक जीवन्त बनाएको छ ।

त्रेतायुगमा मंसिर शुक्ल पञ्चमीका दिन भगवान राम र सीताको दिव्य विवाह भएको स्मरणमा जनकपुरधाममा हरेक वर्ष भव्यताका साथ यो महोत्सव आयोजना गरिँदै आएको छ ।