जनकपुरधाम, १० मंसिर । मिथिलाको सांस्कृतिक पहिचान झल्काउने सप्ताहव्यापी सीताराम विवाहपञ्चमी महोत्सवको मूल अनुष्ठान रामकलेवाका साथ आज सम्पन्न हुन लागेको छ ।

विवाहपञ्चमीको अन्तिम दिन जन्तीका रूपमा आएका साधुसन्तलाई ५६ प्रकारका व्यञ्जन तथा मिष्ठान्न खुवाएर बिदाइ गर्ने परम्परानुसार आज राम कलेवा मनाउन लागिएको हो ।

यसअघि मंगलबार दिउँसो जनकपुरधामको रंगभूमि मैदानमा सम्पन्न रामसीताको स्वयम्बरपश्चात राति १० बजेसम्म मन्दिर परिसरमा वैवाहिक कार्यक्रम आयोजना गरिएको थियो ।

बालबालिकालाई प्रतिकात्मक रूपमा राम, लक्ष्मण, भरत र शत्रुधनको रूपमा तयार गरिँदै साधुसन्तलाई दान–दक्षिणासहित सम्मानपूर्वक बिदाइ गरिएपछि महोत्सवको विधिवत समापन हुने जानकी मन्दिरका सहायक महन्थ रामरोशन दासले जानकारी दिएका छन् ।

मंसिर ४ गतेदेखि सुरु भएको सप्ताहव्यापी महोत्सव विभिन्न सांस्कृतिक कार्यक्रमका कारण झनै आकर्षक बनेको थियो। पहिलो दिन नगरदर्शन, दोस्रो दिन फूलबारी लिला, तेस्रो दिन धनुषा यज्ञ, चौथो दिन तिलकोत्सव, पाँचौँ दिन मटकोर तथा छैटौँ दिन विवाहपञ्चमी मुख्य आकर्षण बने।

स्थानीयवासी, साधुसन्त तथा देश विदेशबाट आएका भक्तजनको सहभागितामा मनाइएको यस वर्षको विवाहपञ्चमी महोत्सवले मिथिला संस्कृतिको समृद्ध इतिहास र धार्मिक परम्परालाई फेरि एकपटक जीवन्त बनाएको छ।

त्रेतायुगमा मंसिर शुक्ल पञ्चमीका दिन भगवान राम र सीताको दिव्य विवाह भएको स्मरणमा जनकपुरधाममा हरेक वर्ष भव्यताका साथ यो महोत्सव आयोजना गरिँदै आएको छ।