जनकपुरधाम, ९ मंसिर । आगामी फागुन २१ गते हुने प्रतिनिधि सभा सदस्य पदको निर्वाचनलाई लक्षित गर्दै धनुषा निर्वाचन क्षेत्र नम्बर–३ मा राजनीतिक सरगर्मी बिस्तारै बढ्न थालेको छ ।

यस्तै बेला स्थानीय सामाजिक क्षेत्रमा सक्रिय रहदै आएका सदाशिव मिश्र ‘ओधबाध’ले आफू संघीय लोकतान्त्रिक मोर्चा र लोकतान्त्रिक समाजवादी पार्टी (लोसपा)को तर्फबाट यस क्षेत्रबाट प्रतिनिधि सभा सदस्य पदका लागि चुनाव लड्ने घोषणा गरेका छन् ।

दीर्घकालदेखि जनकपुरधाम तथा ग्रामीण बस्तीमा सामाजिक सेवा र स्थानीय संरचनाको सुधारका अभियानमा सक्रिय रहेका मिश्रले जनताले उठाउँदै आएका समस्यालाई संसद्मा संस्थागत रूपमा पस्किने समय आएको दाबी गरे ।

मिश्रले भने,’धनुषा–३ को हरेक ठाउँमा पोखिएको समस्या, युवाहरुको रोजगारी संकट, किसानको पीडा, जनकपुरधाम उपमहानगरको अव्यवस्थित सेवालगायतका कुरा म वर्षौँदेखि नजिकबाट देख्दै आएको छु । अब यी मुद्दालाई कथामा नभई संसद्को आवाजमार्फत समाधान गर्ने समय आएको छ ।’

उनका अनुसार यो क्षेत्र विकासका सूचकमा पछाडि परिरहँदा राजनीतिक नेतृत्वले समयमै जनताको पीडा अनुभूत गर्न नसकेको आरोप छ । मिश्रले आफूले जिते ‘इन्फ्रास्ट्रक्चर पुनर्संरचना, कृषि आधुनिकीकरण, युवाका लागि स्थानीय रोजगारी सिर्जना’लाई पहिलो प्राथमिकता दिने बताए ।

मिश्रसँग स्थानीय तहका विभिन्न जनप्रतिनिधि, सामाजिक अगुवा र युवा समूहको साथ रहेको दाबी गरिन्छ ।

उनका पार्टीका नेताहरू भन्छन्, ‘सदाशिवले बस्तीमा पानी, बाटो, विद्यालय सुधारदेखि लिएर वृद्धवृद्धाको उपचार सहयोगसम्म धेरै काम गर्नुभएको छ । उहाँ जस्तै जमीनसँग जोडिएको नेता संसद्मा पुग्नुपर्छ ।’

धनुषा–३ को ठूलो जनसंख्या कृषि, मजदुरी र व्यापारीक काममा आधारित छ । मिश्रले किसानलाई न्यूनतम मूल्य सुनिश्चित गर्ने, सिँचाइका पुराना योजना पुनर्जीवन गर्ने, सहकारीमार्फत महिला उद्यमशीलतालाई बढावा दिने र सीमावर्ती बजार व्यवस्थापन सुधार्ने योजना अघि सारेका हुन् ।

उनले भने, ‘हाम्रो सीमावर्ती क्षेत्रका समस्या विशेष छन् । यहाँका व्यापार, कृषि, रोजगार र सुरक्षाका मुद्दा उस्तै रहेका छन् । सरकारले ध्यान नदिँदा जनता वर्षौँदेखि पीडामा छन् । जनताको मुद्दा संसद्मा पुर्याउन अब म मैदानमा उत्रिएको हुँ ।’

धनुषा–३ यसअघि पनि चुनावी हिसाबले प्रतिस्पर्धात्मक क्षेत्र मानिन्छ । यसपटक मिश्रको उम्मेदवारीसँगै स्थानीय राजनीतिक समीकरणमा नयाँ ऊर्जा देखिने आकलन गरिएको छ । परम्परागत पार्टीका उम्मेदवारसँग उनको प्रतिस्पर्धा कस्तो रहन्छ भन्ने विषयमा सर्वसाधारण निकै चासोका साथ हेरिरहेका छन् ।

मिश्रको सामाजिक सम्बन्ध व्यापक रहेको र गाउँगाउँमा उनको पहुँच बलियो भएकाले चुनावमा उल्लेखनीय प्रभाव देखिन सक्छ ।

मिश्रले भने, ‘धनुषा–३ लाई राजनीतिक दुर्लक्ष्यबाट मुक्त गरेर नमुना निर्वाचन क्षेत्र बनाउन चाहन्छु । विकास, सुशासन र जनताको सम्मान यी तीन विषय मेरो अभियानको मेरुदण्ड हुनेछ । जनताले साथ दिनुभयो भने म प्रत्येक परिवारसँगको भरोसा तोडिँदैन ।’

आगामी फागुन २१ गते हुने निर्वाचनमा मिश्र कति सशक्त रुपमा उदाउँछन् भन्ने कुरा त परिणामले नै देखाउने छ । तर, हालको जनमतले भने धनुषा–३ को राजनीतिमा नयाँ विकल्पका रूपमा उनको नाम बलियोसँग उभिएको देखिन्छ ।