जनकपुरधाम, ९ मंसिर । विवाहपञ्चमी महोत्सवका क्रममा जनकपुरधामस्थित जानकी मन्दिर परिसरमा प्रवेश र बस्ने स्थानका नाममा सेवा शुल्क असुलिएको आरोप लागेको छ ।

सामाजिक सञ्जालमा सार्वजनिक भएको एउटा रसिदजस्तो देखिने पर्चाको आधारमा भक्तजनले मन्दिरमै अनधिकृत रूपमा रकम असुलिएको बताएका छन् ।

प्राप्त पर्चामा ‘जानकी मन्दिर तालुकको सेवा शुल्क बैठकी चिराकी’ लेखिएको छ । मिति ०८२/८/९ अंकित छ । पर्चामा ‘ठेकेदार दिलीप प्रसाद’ भनेर उल्लेख गरिएको छ । तर, यस प्रकारको शुल्क आधिकारिक रूपमा स्वीकृत भएको वा मन्दिर व्यवस्थापन समितिले नै जारी गरेको हो/होइन भन्ने विषय स्पष्ट छैन ।

महोत्सवमा आएका तीर्थयात्रीहरूका अनुसार भीडभाडको फाइदा उठाउँदै केही व्यक्तिहरूले टिकटका नाममा रकम असुलेको आशंका गरिएको छ । ‘मन्दिर परिसर त निःशुल्क हो, तर यहाँ सेवा शुल्क भनेर जबर्जस्ती टिकट काट्दै थिए,’ एक भक्तजनले आक्रोश पोखे ।

जानकी मन्दिरको तर्फबाट भने यससम्बन्धमा आधिकारिक प्रतिक्रिया आइसकेको छैन । समितिको आधिकारिक टिकट वा शुल्कका बारेमा स्पष्ट विवरण सार्वजनिक नगरेका कारण घटना विवादास्पद बन्दै गएको छ ।

विवाहपञ्चमीमा लाखौँ भक्तजन जनकपुरधाम आउने भएकाले सुरक्षा, व्यवस्थापन र शुल्क सम्बन्धी शंकास्पद गतिविधि नियन्त्रण गर्न प्रशासन र मन्दिर व्यवस्थापन सतर्क हुनुपर्ने स्थानीयवासीहरूको माग रहेको छ ।

यस विषयमा संस्कृति तथा धार्मिक महोत्सव व्यवस्थापनमा संलग्न निकायहरूले छानबिन गरी सत्यतथ्य सार्वजनिक गर्नुपर्ने जनप्रतिनिधि तथा नागरिक समाजका अगुवाहरूले सुझाव दिएका छन् ।