महोत्तरी, ८ मंसिर । मधेश प्रदेशका मुख्यमन्त्री सरोजकुमार यादव सोमबार महोत्तरी जिल्लाको सदरमुकाम जलेश्वरस्थित प्रादेशिक अस्पताल जलेश्वरको आकस्मिक अनुगमन तथा निरीक्षण गरेका छन् ।

आकस्मिक रूपमा अस्पताल पुगेका मुख्यमन्त्री यादवले इमरजेन्सी कक्षदेखि भर्ना वार्डसम्मका सबै सेवासुविधा प्रत्यक्ष अवलोकन गर्दै बिरामीहरूको अवस्था बुझेका थिए ।

अनुगमनका क्रममा प्रादेशिक अस्पताल सञ्चालन तथा व्यवस्थापन समितिका अध्यक्ष मिन्नु झा र अस्पतालका निमित्त कार्यालय प्रमुख डा. विकासकुमार साहले अस्पतालमा विशेषज्ञ चिकित्सकसहित विभिन्न स्वास्थ्यकर्मीको गम्भीर अभाव रहेको जानकारी गराए । जनशक्ति अभावका कारण धेरै बिरामीहरू अन्य अस्पतालमा रेफर गर्नुपरेको समस्या उनीहरूले मुख्यमन्त्रीलाई अवगत गराएका थिए ।

मुख्यमन्त्री यादवले अस्पताल प्रशासनलाई तत्काल आवश्यक जनशक्ति नम्बर, विशेषज्ञ चिकित्सक सूची र विस्तृत मागसहितको पत्र त्यही दिन मन्त्रालयमा पठाउन निर्देशन दिँदै भने, ‘कुन–कुन चिकित्सकको अभाव छ, त्यसको पूर्ण विवरण आजै पठाउनुहोस् । मन्त्रालयबाट उपलब्ध हुने सबै चिकित्सक यहाँ पठाइनेछ ।’

सञ्चारकर्मीहरूसँग कुरा गर्दै मुख्यमन्त्री यादवले अदालतले आफूलाई ‘दीर्घकालीन असर पर्ने निर्णय नगर्न’ भनेकाले ठूला संरचनागत सुधार अघि बढाउन कठिनाइ भएको बताए ।

‘अदालतका कारण दीर्घकालीन समाधानका काम अघि बढाउन समस्या छ । तर, दैनिक उपचार सेवामा समस्या आयो भने तत्काल एक्सन लिन्छु,’ उनले भने ।

जनकपुरधाममा हालै सम्पन्न वार्षिक समीक्षा गोष्ठीमा प्रादेशिक अस्पताल जलेश्वर दोस्रो उत्कृष्ट अस्पताल घोषणा गरिएको भए पनि जनशक्ति अभाव, विशेषज्ञ चिकित्सक नहुँदा सेवामा दबाब र उपकरणको कमी जस्ता चुनौती अझै समाधान हुन सकेका छैनन् ।

मुख्यमन्त्रीले अनुगमनका क्रममा भर्ना तथा उपचारमा रहेका बिरामीहरूसँग सीधै संवाद गर्दै सेवासुविधाबारे जानकारी लिए । धेरै बिरामी र उनका आफन्तले विशेषज्ञ अभाव र उपचार ढिलाइ मुख्य समस्या रहेको बताएको स्रोतले जनाएको छ ।

मुख्यमन्त्री यादवले अस्पतालमा देखिएका समस्याहरू प्राथमिकताका साथ समाधान गर्न सरकार सचेत रहेको उल्लेख गर्दै शीघ्र सुधारका लागि पहल गर्ने प्रतिबद्धता व्यक्त गरे । ‘प्रदेशका नागरिकले उपचारका लागि बाहिर धाउनुपर्ने अवस्था अन्त्य गर्छौं,’ उनले भने ।