बारा, ८ मंसिर । बाराको पचरौत नगरपालिका–६ स्थित सीमावर्ती चिकनी–पकडिया क्षेत्रमा आइतबार राति तस्करी नियन्त्रणका क्रममा नेपाल प्रहरी र तस्कर समूहबीच गोली हानाहान भएको छ ।

भन्सार छलीका अवैध मालवस्तु नेपालतर्फ भित्र्याउन लागेको सूचना पाएपछि प्रहरी टोली सीमातर्फ गइसकेपछि तस्कर समूहले प्रहरीमाथि पहिलो आक्रमण गरेको जिल्ला प्रहरी कार्यालय बाराका प्रवक्ता प्रहरी नायब उपरीक्षक विजयराज पण्डितले जानकारी दिए ।

उनका अनुसार भारतको हनुमाननगरबाट ट्याक्टरमा लोड गरेर अवैध सामान ल्याइँदै गरेको सूचना पाएपछि इलाका प्रहरी कार्यालय सिम्रौनगढका प्रहरी निरीक्षक कृष्णादेव प्रसाद साहको कमाण्डमा २० जनाको टोली रोकथामका लागि परिचालन गरिएको थियो ।

नियन्त्रणमा लिन अघि बढेको प्रहरीमाथि तस्करहरूले अचानक दुई राउन्ड गोली प्रहार गरेपछि परिस्थितिलाई स्थिर बनाउन प्रहरीतर्फबाट सात राउन्ड प्रतिकारात्मक गोली फायर गरिएको प्रहरीले जनाएको छ ।

घटनास्थल इँटाभट्टा नजिकै अवैध सामानसहितको ट्याक्टर नियन्त्रणमा लिएर जिल्ला ल्याउने क्रममा तस्करहरूले फेरि समूहगत आक्रमण गरेको प्रहरीले बताएको छ । संख्या धेरै रहेका तस्करहरूले पुनः गोली प्रहार गर्दै ट्याक्टर र सामान छाड्न नदिई भारतीय सीमावर्ती बिन्धवासिनी गाउँतर्फ भागेको प्रहरीको भनाइ छ ।

तस्करहरूले छाडेर भागेका चार थान भारतीय नम्बर प्लेटका मोटरसाइकल, दुई मोबाइल फोन र आधार कार्ड प्रहरीले घटनास्थलमै बरामद गरेको छ ।

नियन्त्रणमा लिइएको ट्याक्टरमा कस्तो प्रकारका अवैध सामग्री थिए भन्ने बारेमा प्रारम्भिक रूपमा पुष्टि भएको छैन । सो क्रममा तस्कर समूहमा क्षतिको विवरण पनि सुरक्षा निकायले पुष्टि गर्न सकेका छैनन् ।