महोत्तरी, ८ मंसिर । आगामी फागुन २१ गते हुने प्रतिनिधिसभा निर्वाचनलाई लक्षित गर्दै महोत्तरीमा मतदाता नामावली अद्यावधिक अभियान सम्पन्न भएको छ ।

जिल्ला निर्वाचन कार्यालयका अनुसार असोज ९ गतेदेखि मंसिर ५ गतेसम्म चलेको फोटोसहितको मतदाता नामावली संकलन कार्यक्रममा २५ हजार २५४ नयाँ मतदाता थपिएका छन् ।

जिल्ला निर्वाचन अधिकारी रञ्जिता झाका अनुसार कार्यालयमा सीधै उपस्थित भएकामध्ये ३ हजार ९३९ पुरुष र २ हजार ८८९ महिला गरी ६ हजार ८२६ जनाले नाम दर्ता गराएका छन् । यसका अतिरिक्त १८ हजार ४२६ जनाले राष्ट्रिय परिचयपत्रमार्फत अनलाइन प्रणाली प्रयोग गरेर मतदाता नामावलीमा नाम समावेश गराएको उनले बताइन् ।

महोत्तरीमा १० नगरपालिका र ५ गाउँपालिका गरी १५ स्थानीय तह छन् । यसैगरी, जिल्लामा ४ वटा प्रतिनिधिसभा निर्वाचन क्षेत्र रहेका छन् । आसन्न निर्वाचन तयारीलाई सुदृढ बनाउन निर्वाचन आयोगले देशभर मतदाता नामावली संकलन अघि बढाएको थियो ।

नयाँ मतदाता थपिएसँगै आगामी प्रतिनिधिसभा निर्वाचनमा महोत्तरीको मतदाता संख्या उल्लेखनीय रूपमा बढ्ने अनुमान गरिएको छ ।