जनकपुरधाम, ८ मंसिर । धनुषामा एक गरिब परिवारमाथि जबरजस्ती गरी घर भत्काइदिएको घटनाले स्थानीयवासीलाई स्तब्ध बनाएको छ ।

गणेशमान चारनाथ नगरपालिका–११ डुमरिया बस्ने टुनु ठाकुरको घरमा सोही क्षेत्रका हेडमास्टर शम्भु यादवले डोजर चलाएर उठीवास गराएको आरोप बाहिरिएको हो ।

पीडित परिवारका अनुसार सार्वजनिक जग्गा (गाउँ ब्लक) मा लगभग २५ वर्षदेखि भोगचलन गर्दै आएका ठाकुर परिवारमाथि यादवले लामो समयदेखि दबाब दिँदै आएका थिए ।

पीडित टुनु ठाकुरका अनुसार शम्भु यादवको जमिन पछाडिपट्टि रहेको र त्यसको अगाडिको जग्गा आफूलाई दिन बारम्बार दबाब दिँदै आएका थिए । ‘बहुसङ्ख्यक हुँ’ भन्दै धम्की दिने यादवले जग्गा नदिए घर नै भत्काइदिने चेतावनी दिँदै आएका थिए । अन्ततः गत शनिबार यादवले विभिन्न गाउँबाट मानिसहरू बोलाई मास्क लगाएका व्यक्तिहरूको समूहमार्फत बलपूर्वक डोजर चलाएको पीडित पक्षको आरोप छ ।

घटना हुँदा घरमा बाँधिएका दुई वटा बाख्राका पाठोसमेत डोजरले किचेर मृत अवस्थामा फेला परेको टुनु ठाकुरकी श्रीमतीले बताइन् । उनले हारगुहार गर्दा पनि कोही आएर सहयोग नगरेको भन्दै स्थानीय प्रशासनप्रति आक्रोश व्यक्त गरिन् । ‘आठ जना परिवार कहाँ बस्ने? के खाने? के लगाउने? अहिले त्रिपालमुनी रात बिताउन बाध्य भएका छौँ,’ उनले दुःखेसो पोखिन् ।

पीडित परिवार अहिले चिसो मौसममा घरबारविहीन बनेर खुला आकाशमुनी रात बिताउन बाध्य छ । उनीहरू समग्र समाजसँग न्यायका लागि आवाज उठाइदिन आग्रह गरिरहेका छन् ।

आरोपित शम्भु यादव धनुषाको रघुनाथपुरस्थित स्थानीय विद्यालयमा हेडमास्टरका रूपमा कार्यरत छन् । सो घटनाबारे उनको धारणा लिन प्रयास गर्दा सम्पर्क हुन सकेन । स्थानीयका अनुसार घटना सार्वजनिक भएपछि यादव अन्य स्थानतर्फ गएको बताइएको छ ।