जनकपुरधाम, ८ मंसिर । विवाहपञ्चमी २०८२ को पावन अवसरमा मधेश प्रदेशका प्रदेश प्रमुख डा. सुरेन्द्र लाभ कर्णले प्रदेशवासीलगायत देश विदेशबाट जनकपुरधाम आएका श्रद्धालु भक्तजन तथा पाहुनालाई हार्दिक शुभकामना व्यक्त गरेका छन् ।

जनकपुरधाममा जारी सप्ताहव्यापी विवाहपञ्चमी महोत्सवले मिथिला संस्कृतिको गौरव, धार्मिक आस्था र पौराणिक विरासतलाई विश्वमाझ उजागर गरिरहेको उल्लेख गर्दै उनले उत्सवले सबैमा शान्ति, सद्भाव र समृद्धिको कामना गर्न आग्रह गरेका हुन् ।

शुभकामना सन्देशमा प्रदेश प्रमुख कर्णले जनकपुरधामलाई ‘पवित्रता र सांस्कृतिक पहिचानको पर्याय’ भन्दै यहाँको सौन्दर्य, दिव्यता र स्वच्छताको संरक्षण सबैको नैतिक दायित्व हुने बताए ।

‘जनकपुरधाम यहाँ उपस्थित प्रत्येक श्रद्धालुजनको साझा सम्पत्ति हो, यसको गरिमा जोगाउन सबैको सानो सहयोग पनि महत्त्वपूर्ण हुन्छ,’ कर्णले भने ।

माता सीता र प्रभु श्रीरामको दिव्य मिलन दिवसका रूपमा मनाइने विवाहपञ्चमी राष्ट्रिय तथा अन्तर्राष्ट्रिय श्रद्धालुहरूको केन्द्रबिन्दु बनिरहेको जनाउँदै कर्णले जनकपुरधाम आगन्तुकहरूलाई हार्दिक स्वागत समेत गरे । उनले यस धार्मिक यात्रा सबै पाहुनाका निम्ति अविस्मरणीय र सुखद बन्ने विश्वास व्यक्त गरे ।