जनकपुरधाम, ८ मंसिर । ऐतिहासिक तथा धार्मिक महत्व बोकेको सप्ताहव्यापी सीताराम विवाह पञ्चमी महोत्सव अन्तर्गत पाँचौँ दिन मनाइने मटकोर विधि आज जनकपुरधाममा अत्यन्तै भव्य र सांस्कृतिक धुमधामका साथ सम्पन्न भएको छ ।

मिथिला परम्परामा भगवान रामसीताको वैदिक विवाह संस्कारको महत्वपूर्ण चरण मानिने मटकोरमा सहभागी हुन बिहानैदेखि हजारौँ भक्तजन जनकपुरधामका परिक्रमा मार्ग तथा जानकी मन्दिर परिसरमा जम्मा भएका थिए ।

आजको दिन जनकपुरधाम पूर्णतः भक्तिमय तथा सांस्कृतिक रंगमा रंगिएको थियो । बिहानैदेखि मन्दिर परिसरमा धार्मिक धुन, बाजागाजा, वैदिक मन्त्रोच्चारण र रथ–झाँकीसहितको शोभायात्राले वातावरण उल्लासपूर्ण बनाएको थियो । परम्पराअनुसार जनकपुरधामका पुरोहित, वैदिक आचार्य, साधुसन्त तथा स्थानीयवासीको अगुवाइमा मटकोरका लागि माटो उठाउन विशेष जुलुस गंगासागर पोखरी प्रस्थान गरेको थियो ।

मिथिला संस्कृतिमा अत्यन्तै पवित्र मानिने यो विधिमा महिलाहरूको विशेष सहभागिता रह्यो । उनीहरू परम्परागत मैथिली पोशाक, सिन्दूर, अकुरी, धूप–दीप तथा कलशसहित उपस्थित भएर विधिलाई अझै आकर्षक बनाइन् । सांस्कृतिक टोलीहरूद्वारा प्रस्तुत मैथिली भजन, नाच र झाँकीहरूले वातावरणमा आध्यात्मिक ऊर्जा थपेको थियो ।

विवाहपञ्चमी महोत्सवअन्र्तगत भोलि छैटौँ दिन ‘स्वयंवर’ र सीतारामको दिव्य विवाहोत्सव जानकी मन्दिर परिसरमा वैदिक विधिअनुसार भव्यरूपमा सम्पन्न गरिनेछ । जनकपुरधाममा देश विदेशबाट आगन्तुक भक्तजनको भीड झनै बढ्दै गएको छ ।