जनकपुरधाम, ८ मंसिर । विवाहपञ्चमीको अवसरमा नेपाली सेनाले सोमबारदेखि जनकपुरधाममा तीनदिने निःशुल्क स्वास्थ्य शिविर सञ्चालन गरेको छ ।

जनकपुरधामको रंगभूमि मैदानमा सुरु गरिएको शिविरमा सर्वसाधारणलाई निःशुल्क उपचार, स्वास्थ्य परामर्श तथा विभिन्न परीक्षण सेवा प्रदान गरिनेछ ।

विशेष धार्मिक पर्वका बेला बढ्ने भीडभाड र जनस्वास्थ्यसम्बन्धी आवश्यकतालाई ध्यानमा राख्दै नागरिकमैत्री सेवा उपलब्ध गराउने उद्देश्यले स्वास्थ्य शिविर सञ्चालन गरिएको नेपाली सेनाले जनाएको छ ।

शिविरमा दन्त, नेत्र, सामान्य स्वास्थ्य परीक्षण, रक्तचाप तथा मधुमेह जाँच, महिला स्वास्थ्य परामर्शलगायत सेवा विशेषज्ञ टोलीद्वारा प्रदान गरिँदैछ ।

डाक्टर, स्वास्थ्य विशेषज्ञ, प्राविधिक तथा औषधि व्यवस्थासहितको टोली परिचालन गरिएको शिविरमा दैनिक हजारौँ नागरिकको उपस्थिती रहने विश्वास गरिएको छ ।

विवाहपञ्चमीको सांस्कृतिक महत्त्वसँगै समुदायमा सेवा सहयोगको सकारात्मक सन्देश प्रवाह गर्ने उद्देश्यले यस्तो आयोजनाले समाजमा महत्वपूर्ण प्रभाव पार्ने विश्वास सेनाले व्यक्त गरेको छ ।