जनकपुरधाम, ८ मंसिर । मधेश प्रदेश सरकारले विवाहपञ्चमीमा प्रदेशभर सार्वजनिक बिदा दिने निर्णय गरेको छ ।

गृह, सञ्चार तथा कानून मन्त्रालयद्वारा जारी सूचनामा मंसिर ९ गते मंगलबारका दिन विवाहपञ्चमीका अवसरमा प्रदेशभर सरकारी कार्यालय, शिक्षण संस्था तथा सार्वजनिक निकायहरू बन्द रहने उल्लेख गरिएको छ ।

प्रदेश सरकारद्वारा २०८१ साल चैत्र २२ गते प्रकाशित राजपत्रमा समावेश वार्षिक बिदा सूचीअनुसार विवाह पञ्चमीलाई प्रदेशकै महत्वपूर्ण सांस्कृतिक तथा धार्मिक पर्वका रूपमा समेटिएको थियो । उक्त प्रावधानअनुसार मंसिर ९ गतेको बिदा लागू हुने जनाइएको छ ।

मन्त्रालयका शाखा अधिकृत राधेशंकर प्रसाद पालद्वारा हस्ताक्षरित सूचनामा विवाहपञ्चमी मिथिला क्षेत्रमा विशेष महत्व राख्ने धार्मिक पर्व भएकाले सार्वजनिक बिदा घोषणा गरिएको उल्लेख छ ।

विवाहपञ्चमीमा जनकपुरधाममा हरेक वर्ष भव्य तरिकाले सीताराम विवाह महोत्सव मनाइन्छ । मेलामा देश विदेशका लाखौँ भक्तजन सहभागी हुने गरेका छन् ।