जनकपुरधाम, ८ मंसिर । मधेश प्रदेशमा नयाँ कार्यविभाजन सार्वजनिक भएको छ ।

मुख्यमन्त्री सरोजकुमार यादवको सिफारिसमा प्रदेश प्रमुख डा. सुरेन्द्र लाभ कर्णले सोमबार मन्त्रिपरिषद्का सदस्यहरूका कार्य जिम्मेवारी तोकिदिएका छन् ।

प्रदेश प्रमुख कार्यालयले जारी गरेको विज्ञप्तिअनुसार कार्तिक २३ गते नियुक्त भएका मन्त्रीहरूको कार्यविभाजन औपचारिक रूपमा लागू गरिएको हो ।

विज्ञप्तिमा उल्लेख भएअनुसार मुख्यमन्त्री यादवले मुख्यमन्त्री तथा मन्त्रिपरिषद् कार्यालय सहित भौतिक पूर्वाधार विकास, भूमि व्यवस्था, कृषि तथा सहकारी, उद्योग, वाणिज्य तथा पर्यटन, शिक्षा तथा संस्कृति, स्वास्थ्य तथा जनसंख्या, अर्थ, खेलकुद तथा समाज कल्याण र श्रम तथा यातायात गरी नौवटा मन्त्रालयको जिम्मेवारी आफ्नो मातहत राखेका छन् ।

प्रदेश सरकार गठन भएको करिब दुई सातापछि अधिकांश महत्वपूर्ण मन्त्रालय मुख्यमन्त्रीकै जिम्मामा केन्द्रित भएको छ ।

त्यसैगरी, लखन दास तत्मालाई ऊर्जा, सिंचाइ तथा खानेपानी मन्त्रालयको जिम्मेवारी तोकिएको छ । विमला अंसारी तरन्नुमले गृह, सञ्चार तथा कानून मन्त्रालय सम्हाल्नेछिन् भने कञ्चन बिच्छालाई भने वन तथा वातावरण मन्त्रालय जिम्मा दिइएको छ ।

कार्यविभाजन तत्कालै लागू हुने प्रदेश प्रमुख कार्यालयका निमित्त सचिव शत्रुधन यादवद्वारा हस्ताक्षरित विज्ञप्तिमा उल्लेख छ ।