सप्तरी, ७ मंसिर । अग्निसाइर कृष्णासवरन गाउँपालिकाका शिक्षक र विद्यालय कर्मचारीहरूले चार महिनादेखि रोकिएको तलब अन्ततः पाएका छन् ।

गाउँपालिकाको आन्तरिक विवादका कारण साउन महिनादेखि तलब दिने क्रम रोकिएपछि शिक्षकहरूले विद्यालय बन्द गरी गाउँपालिका कार्यालयमा धर्ना दिएका थिए ।

लामो समयको आन्दोलनपछि गत शुक्रबार साउनदेखि असोजसम्मको तलबसँगै दशैं भत्ता पनि वितरण भएको आधारभूत विद्यालयका प्रधानाध्यापक दुखन यादवले बताए । ‘दशैं–तिहारै बित्यो, तलब र भत्ता पाएनौँ । अब आएपछि केही राहत मिल्यो,’ यादवले भने ।

गाउँपालिकाभित्रका १६ विद्यालयका शिक्षक तथा कर्मचारीहरू मजदूरी, पारिश्रमिक र भत्ताविहीन अवस्थाले प्रभावित रहेपछि निरन्तर दबाब सिर्जना गर्दै आएका थिए ।

तलब वितरणसँगै आन्दोलन स्थगित भए पनि शिक्षकहरूले पालिकाभित्रको विवादले शिक्षा क्षेत्र प्रभावित नपारोस् भन्ने चिन्ता व्यक्त गरेका छन् ।