जनकपुरधाम, ७ मंसिर । मङ्गलबार मनाइने ऐतिहासिक तथा धार्मिक महत्वको विवाह पञ्चमी महोत्सव नजिकिँदै गर्दा भीड व्यवस्थापन र सवारी नियमन सुनिश्चित गर्न लोकतान्त्रिक विद्यार्थी संघ (लोविसंघ) ले जिल्ला ट्राफिक प्रहरीलाई ध्यानाकर्षण गराएको छ ।

आइतबार लोविसंघ नगर कार्यसमिति जनकपुरधामले जिल्ला ट्राफिक प्रहरी कार्यालय धनुषालाई ज्ञापनपत्र बुझाउँदै महोत्सव अवधिमा प्रभावकारी ट्राफिक व्यवस्थापनको माग गरेको हो ।

लोविसंघका नगर सचिव ऋतिक झाका अनुसार महोत्सवको संवेदनशीलता, यात्रु भीड, धार्मिक स्थलहरूको सुरक्षाबोध र आवागमनका चुनौतीलाई मध्यनजर गर्दै तीन बुँदे सुझाव प्रस्तुत गरिएको छ ।

संघले रामानन्द चौक, जानकी मन्दिर, राम मन्दिर र रंगभूमिजस्ता अत्यधिक भीड हुने संवेदनशील क्षेत्रलाई ‘नो–भेहिकल जोन’ बनाउनुपर्ने सुझाव दिएको छ । साथै, भीड भएको क्षेत्रमा सवारी पार्किङ पूर्ण रूपमा रोक्न ‘नो–पार्किङ’ क्षेत्र घोषणा गर्न ट्राफिक प्रहरीलाई आग्रह गरिएको छ ।

महोत्सव अवधिभरि जानकी मन्दिर, रंगभूमि मैदान र राम मन्दिर क्षेत्रका मुख्य मार्गमा चल्ने ठेला तथा फुटपाथ व्यापारले बाटो साँघुरो बनाउने भन्दै ती गतिविधि अस्थायी रूपमा रोक्न प्रशासनसँग समन्वय गर्न संघले जोड दिएको छ । भीड व्यवस्थापन सहज बनाउन निश्चित मार्गलाई ‘पैदल यात्री मात्र’ क्षेत्र तोक्न पनि संघको माग छ ।

विवाह पञ्चमीमा लाखौँ भक्तजनको आगमन हुने भएकाले प्रहरी संख्या बढाउनुपर्ने र आकस्मिक अवस्थालाई ध्यानमा राख्दै ‘आपतकालीन लेन’ निर्धारण गर्नुपर्ने माग संघले राखेको छ ।

लोविसंघका नगर सचिव ऋतिक मिश्रले महोत्सवलाई मर्यादित, सुरक्षित र सुचारु बनाउन समयमै ट्राफिक व्यवस्थापनमा सक्रियता देखाउन सरोकारवाला निकायको ध्यानाकर्षण गराउँदै भने, ‘पहुँचमार्ग सहज भएमा धार्मिक कार्यक्रमहरूको प्रतिष्ठा अझ बढ्छ ।’