जनकपुरधाम, ७ मंसिर । जनकपुर–ढल्केवर सडकखण्डअन्तर्गत नक्टाझिझास्थित जेब्रा क्रसिङनजिक आइतबार बिहान कारले ठक्कर दिँदा एक वृद्ध दम्पत्तिको मृत्यु भएको छ ।

साइकलमा सवार मिथिला नगरपालिका–१ लक्ष्मीनिवासका ६० वर्षीय राजकुमार महतो र ५५ वर्षीया उनकी पत्नी सुमित्रा देवी महतोको ज्यान गएको प्रहरीले जनाएको छ ।

दुर्घटनास्थलमै सुमित्रा देवीको मृत्यु भएको थियो भने गम्भीर घाइते भएका राजकुमार महतोको प्रादेशिक अस्पताल जनकपुरधाममा उपचारका क्रममा मृत्यु भएको हो ।

बागमती प्रदेश–०३१ च २०३६ नम्बरको कार जनकपुरधामबाट ढल्केवरतर्फ तीव्र गतिमा गइरहेको बेलामा जेब्रा क्रसिङनजिकै सडक छेउमा साइकलमा हिँडिरहेका दम्पत्तिलाई ठक्कर दिएको बताइएको छ ।

सिसिटिभी फुटेजका अनुसार कार अचानक साइड लेनतर्फ मोडिँदै दम्पत्तिलाई फिल्मी शैलीमा उछालेको दृश्य देखिन्छ ।

दुर्घटनापछि दुवै शव पोष्टमार्टमका लागि प्रादेशिक अस्पतालमा राखिएको प्रहरीले जानकारी दिएको छ ।