पर्सा, ६ मंसिर । वीरगंज, ६ मंसिर । देशकै प्रमुख भन्सार नाकाका रूपमा मानिने वीरगंज भन्सार कार्यालयले चालु आर्थिक वर्ष २०८२/८३ का पहिलो चार महिनामा ७५ अर्ब ५८ करोड ८५ लाख रुपैयाँ राजस्व संकलन गरेको छ ।

अर्थ मन्त्रालय भन्सार विभागले तोकेको लक्ष्यअनुसार यो संग्रह लक्ष्यभन्दा झण्डै १३ अर्ब ६४ करोड ९४ लाख रुपैयाँले कम रहेको छ । कार्यालयले लक्ष्यअनुसारको राजस्व उठाउन नसक्दा पहिलो चौमासिकमा करिब १६ प्रतिशत राजस्व घाटा देखिएको छ ।

भन्सार प्रशासक विष्णु प्रसाद ज्ञवालीका अनुसार भन्सार क्षेत्र विभिन्न आन्दोलन, बन्द हडताल, वर्षायाम र डुबानजस्ता कारणले बारम्बार प्रभावित भएको छ । यसका कारण मालसामानको आयातसमेत घट्दै गएपछि राजस्व संग्रहमा ठूलो असर परेको हो । ‘दुई ठूला भन्सार वीरगंज भन्सार कार्यालय र सिर्सिया सुक्खा बन्दरगाह गाभेर हेर्दा यो चौमासिकमा लक्ष्यअनुसार राजस्व संकलन गर्न चुनौती परेको देखियो,’ ज्ञवालीले भने ।

अर्थ मन्त्रालयले साउनदेखि कार्तिकसम्मको चार महिनाका लागि वीरगंज भन्सार कार्यालय (आइसिपी) लाई ८९ अर्ब २३ करोड ७९ लाख रुपैयाँ संकलनको लक्ष्य दिएको थियो । तर, कार्यालयले जम्मा ७५ अर्ब ५८ करोड ८५ लाख रुपैयाँ मात्र संकलन गर्न सक्यो । पेट्रोलियम पदार्थको आयातमा आएको कमी पनि लक्ष्य सुचकांक घट्नको अर्को प्रमुख कारण बनेको भन्सार कार्यालयको विश्लेषण छ ।

यद्यपि, पछिल्लो आर्थिक वर्षको तुलनामा यो वर्ष राजस्व वृद्धि भएको भन्सारले जनाएको छ । गत आर्थिक वर्षको सोही अवधिमा वीरगंज भन्सारले ६६ अर्ब ७३ करोड १९ लाख रुपैयाँ राजस्व संकलन गरेको थियो । यस वर्ष भने सोभन्दा करिब ९ अर्बभन्दा बढी राजस्व संकलन गर्न सफल भएको प्रशासक ज्ञवालीले जानकारी दिए ।

गत वर्ष पनि अर्थ मन्त्रालयले वीरगंज भन्सारलाई ९० अर्ब ५ करोड रुपैयाँ लक्ष्य निर्धारण गरेको थियो । त्यो लक्ष्य त्यतिबेलासमेत पूरा हुन सकेको थिएन ।

चालु आर्थिक वर्ष २०८२/८३ का लागि वीरगंज भन्सार कार्यालयलाई अर्थ मन्त्रालयले २ खर्ब ७३ अर्ब ३९ करोड रुपैयाँ राजस्व संकलनको वार्षिक लक्ष्य तोकेको छ । पहिलो चौमासिकमै लक्ष्यभन्दा अप्राप्त रकम बढ्दै गएपछि आगामी महिनाहरूमा चुनौती झनै बढ्ने देखिएको छ ।