सर्लाही, ६ मंसिर । तराई–मधेशमा जाडोको प्रभाव चर्किन थालेसँगै सर्लाहीका कार्यालय प्रमुखहरूको संयुक्त बैठकले शीतलहर प्रभावितका लागि राहत तथा पूर्वतयारी योजना तत्काल लागू गर्ने निर्णय गरेको छ ।

मंसिरदेखि फागुन मसान्तसम्म शीतलहरको जोखिम अत्यधिक हुने अनुमानसहित बसेको बैठकले सबै सरकारी कार्यालयलाई पूर्वतयारी तथा प्रतिकार्य योजनालाई प्रभावकारी रूपमा लागू गर्न कडाइका साथ निर्देशन दिएको हो ।

प्रमुख जिल्ला अधिकारी रामुराज कडरियाको अध्यक्षतामा बसेको बैठकले राष्ट्रिय विपद् जोखिम न्यूनीकरण तथा व्यवस्थापन प्राधिकरणले उपलब्ध गराएको शीतलहर पूर्वतयारी तथा प्रतिकार्य योजना–२०८२ तत्कालै कार्यान्वयनमा लैजाने निर्णय गर्यो ।

जिल्लाभर चिसोको प्रभाव बढ्दै गएपछि जनधनको जोखिम नहोस् भन्नका लागि स्वास्थ्य, सुरक्षा, राहत र जानकारी प्रवाह सबै किसिमका तयारीलाई समन्वय गरेर अघि बढाउने सहमति बनेको कडरियाले बताए ।

बैठकले सबै स्थानीय तहलाई ‘आपतकालीन कार्यसञ्चालन केन्द्र कार्यविधि–२०८२’ अनुसार स्थानीय आपत्कालीन केन्द्र स्थापना गरी तत्काल सञ्चालनमा ल्याउन निर्देशन दिएको छ ।

चिसोले जोखिम बढ्न सक्ने कमजोर समुदाय, विपन्न परिवार, ज्येष्ठ नागरिक र बालबालिकालाई लक्षित गरी राहत वितरण, शिविर सञ्चालन र आवश्यक सामग्री व्यवस्थापनमा स्थानीय तहले सक्रियता देखाउनुपर्ने बैठकको निष्कर्ष रहेको छ ।

सार्वजनिक सेवा प्रवाह शीतलहरको बीचमा पनि अवरुद्ध नहोस् भनेर सबै कार्यालयलाई स्पष्ट कार्यादेश दिइएको प्रजिअ कडरियाले बताए । उनले सेवा प्रवाहलाई छिटोछरितो, गुनासोरहित र प्रभावकारी बनाउने लक्ष्यअनुसार कार्यालय प्रमुखहरूले आफ्ना योजनाहरू अद्यावधिक गरी कार्यान्वयनमा जोड दिनुपर्ने बताए ।

बैठकले कर्मचारी मिलन केन्द्र सर्लाहीको कार्यकाल सकिएको हुँदा नयाँ समिति गठन गर्ने निर्णय पनि गरेको छ । मलंगवा नगरपालिकाका प्रमुख प्रशासकीय अधिकृत होमप्रसाद घिमिरेको अध्यक्षतामा ७ सदस्यीय तदर्थ समिति बनाइएको छ ।

समितिमा उपाध्यक्ष उपेन्द्रप्रसाद सिंह, कोषाध्यक्ष सम्झना लामिछाने तथा सदस्यहरू उमेश महतो, धन्नजयप्रसाद दास, शशी यादव र मुकेशकुमार यादव रहेका छन् ।

शीतलहरका कारण हुन सक्ने जनधनको सम्भावित जोखिमलाई न्यून गर्न सम्बद्ध सबै निकायले समन्वयमा काम गर्ने प्रतिबद्धता व्यक्त गरेका छन् । स्वास्थ्य सेवा, राहत प्रणाली, आवास, सडक तथा सञ्चार क्षेत्रलगायतका सम्बन्धित कार्यालयहरूलाई उच्च सतर्कताका साथ तयारीमा जुट्न बैठकले निर्देश दिएको छ ।