जनकपुरधाम, ६ मंसिर । लामो समयदेखि अलपत्र पारिएको धनुषा र सिरहा जोड्ने कमला नदीको अधुरो पुल अब तीन महिनाभित्रै सम्पन्न हुने दाबी निर्माण कम्पनीले गरेको छ ।

भौतिक पूर्वाधार तथा यातायातमन्त्री कुलमान घिसिङले शुक्रबार स्थलगत निरीक्षण गर्दै स्थानीयको समस्यालाई प्रत्यक्ष अनुभूति गरेपछि निर्माण कम्पनीले समयमै काम सक्ने प्रतिबद्धता जनाएको हो ।

विसं २०६८ मा तीन वर्षभित्र निर्माण सक्ने गरी सम्झौता भएर सुरु गरिएको पुल १४ वर्ष बिते पनि अझै पूर्ण नभएपछि स्थानीय वर्षौंदेखि जोखिम र कष्ट सहेर दैनिक आवतजावत गर्दै आएका छन् ।

तराई–मधेशको लाइफ लाइन मानिने हुलाकी राजमार्गअन्तर्गत पर्ने यो पुल अपूरा हुँदा दुवै जिल्लाका हजारौं बासिन्दा वर्षेनी बाढी, डुबान र आवतजावतको असहजतामा परेको गुनासो गर्दै आएका छन् ।

स्थलगत निरीक्षणका क्रममा मन्त्री घिसिङले स्वयं डुङ्गा चढेर नदी पार गर्दै स्थानीयले वर्षौंदेखि भोग्दै आएको दैनिक कष्टलाई नजिकबाट अनुभूति गरे । उनले सामाजिक सञ्जालमा लेख्दै भने, ‘विसं २०६८ मा तीन वर्षमै सकिने पुल आजसम्म अधुरो छ र यसको सबैभन्दा धेरै मार स्थानीय बासिन्दाले बेर्हनुपरेको छ । निरीक्षणका क्रममा उनीहरूको दैनिक सास्ती र जोखिम प्रत्यक्ष देख्दा मन भारी भयो ।’

उनले तत्काल आवतजावत सहज बनाउन अस्थायी विकल्पबारे समेत सम्बन्धित निकायसँग विस्तृत छलफल भएको बताउँदै प्राविधिक पक्षमा उठेको प्रश्नमा मन्त्रालय जिम्मेवार भएर अघि बढ्नेमा जोड दिए । ‘अब नियमित अनुगमन र सहजीकरणमार्फत कामलाई छिटो पूरा गरिनेछ,’ मन्त्री घिसिङले भने ।

स्थलगत निरीक्षणमा सहभागी लुम्बिनी बिल्डर्सका सञ्चालक विष्णुप्रसाद शर्माले तीन महिनाभित्र पुल निर्माण पूरा गर्ने दाबी गर्दै भने, ‘हामी मन्त्रीज्यू समक्ष तीन महिनाभित्र पुल सञ्चालनमा ल्याउने प्रतिवद्धता व्यक्त गर्दछौँ ।’

यो पुलअघि पप्पु कन्स्ट्रक्सनले लिएको ठेक्का तीन वर्षमा सक्नुपर्ने भए पनि पटक–पटक म्याद थपिँदै पनि काम सम्पन्न नगरेपछि पप्पु कालोसूचीमा पर्यो । त्यसपछि बाँकी काम लुम्बिनी बिल्डर्सले गर्दै आएको हो ।

कुल ४६९ मिटर लम्बाइको पुलको हालसम्म ८३ प्रतिशत भौतिक र ८२ प्रतिशत वित्तीय प्रगति भएको छ । विसं २०७८ असार १७ मा आएको भीषण बाढीले पुलका दुई जग भासिँदा काममा थप अवरोध पुगेको थियो । हाल पुल निर्माण सम्झौताका म्याद नवौँ पटक थप्ने प्रक्रिया अगाडि बढिरहेको छ ।

मन्त्री घिसिङसँगै स्थलगत निरीक्षणमा युवा तथा खेलकुदमन्त्री बब्लु गुप्ता, सचिव केशवकुमार शर्मा, सडक विभागका महानिर्देशक विजय जैशी, हुलाकी राजमार्ग निर्देशनालयका प्रतिनिधि, योजना कार्यालय जनकपुरका प्रमुख कृष्णकुमार महतो तथा जनप्रतिनिधि र स्थानीय अगुवाहरूको टोली सहभागी थियो । टोलीले पुलको प्राविधिक अवस्था, कार्यगत प्रगति र बाँकी कामको विवरण लिएर आवश्यक निर्देशन दिएको थियो ।

धनुषा–सिरहा सीमामा रहेको कमला नदीको यो पुल मधेश प्रदेशका लागि अत्यन्त रणनीतिक महत्वको मानिन्छ । पुल सञ्चालनमा आएपछि तराई–मधेशका पूर्व–पश्चिम यातायात सहज हुँदै जनकपुर, सिरहा, लहान र आसपास क्षेत्रको व्यापार तथा सेवा क्षेत्र सुदृढ हुने विश्वास गरिएको छ ।

मन्त्रालयका अनुसार अब पुल निर्माणलाई प्राथमिकताका साथ अघि बढाइँदै नियमित अनुगमनमार्फत तोकिएको समयभित्र काम सम्पन्न गरिनेछ ।