रौतहट, ५ मंसिर । गरुडा नगरपालिका–१ जयनगरमा स्कुल बसको ठक्करबाट दुई वर्षीय बालकको मृत्यु भएको छ ।

शुक्रबार बिहान करिब सवा ८ बजे ओम एकेडेमी स्कुलको बसले ठक्कर दिँदा बालकको घटनास्थलमै ज्यान गएको जिल्ला प्रहरी कार्यालय रौतहटले जनाएको छ ।

ज्यान गुमाउनेमा जयनगरका रंजन साहका दुई वर्षीय छोरा आदित्यकुमार साह रहेका छन् । जयनगरबाट मानपुरतर्फ जाँदै गरेको प्रदेश–३–००१ ख १७२६ नम्बरको स्कुल बसले बालकलाई ठक्कर दिएको प्रहरीले जनाएको छ ।

प्रहरी नायब उपरीक्षक विष्णु प्रदीप बस्यालका अनुसार गम्भीर घाइते बालकको घटनास्थलमै मृत्यु भएको पुष्टि गरिएको छ । शवलाई पोष्टमार्टमका लागि प्रादेशिक अस्पताल गौर पठाइएको छ ।

दुर्घटनामा संलग्न बस इलाका प्रहरी कार्यालय गरुडाको नियन्त्रणमा रहेको छ भने बस चालक घटनापछि फरार भएका कारण उनको खोजी जारी रहेको प्रहरीले जनाएको छ ।

प्रहरीले दुर्घटनाबारे विस्तृत अनुसन्धान सुरू गरेको छ ।