बारा, ५ मंसिर । बाराको पथलैयास्थित सशस्त्र प्रहरी बल प्राविधिक तालिम केन्द्रमा शुक्रबार जेनजी समूह र स्थानीय प्रशासनबीच भएको वार्ता सकारात्मक निष्कर्षमा पुगेको छ ।

हालै सिमरामा भएको झडपपछि उत्पन्न तनाव समाधान गर्ने उद्देश्यसहित आयोजित वार्तामा जेनजीले उठाएका प्रमुख मागहरू सम्बोधन गर्न प्रशासन सहमत भएको छ ।

वार्तामा बाराका प्रमुख जिल्ला अधिकारी धर्मेन्द्र कुमार मिश्र, सुरक्षा निकायका प्रमुखहरू तथा विभिन्न निकायका प्रतिनिधि सहभागी थिए । जेनजीको तर्फबाट सम्राट उपाध्यायको नेतृत्वमा १८ सदस्यीय टोली सहभागी भयो। दुई घन्टासम्म चलेको वार्तामा दुवै पक्षबीच संवेदनशील विषयहरूबारे विस्तृत छलफल भयो ।

जेनजी समूहले घटनामा संलग्न व्यक्तिहरूमाथि पूर्वाग्रह नराखी कानुनी कारबाही गर्नुपर्ने, घाइतेहरूको निःशुल्क उपचार तथा उचित क्षतिपूर्ति राज्यले व्यहोर्नुपर्ने, आन्दोलनमा सहभागी तथा सहयोग गर्ने सबैको सुरक्षाको ग्यारेन्टी गर्नुपर्ने, सुरक्षाप्रबन्धमा लापरबाही गर्ने अधिकारीमाथि कारबाही गर्नुपर्ने लगायत माग राखेका थिए ।

त्यस्तै, झडपअघि तीन दिनदेखि एमाले नेता अरविन्द साहको कल डिटेल निकालेर ‘मुख्य योजना बनाउने व्यक्तिलाई’ अनुसन्धानको दायरामा ल्याउनुपर्ने तथा छुटेका व्यक्तिलाई पनि अभियुक्त बनाई पक्राउ प्रक्रिया अघि बढाउनुपर्ने माग जेनजी टोलीले प्रस्तुत गरेको थियो ।

वार्ता भइरहेकै क्रममा जेनजीका अगुवा सुदन गुरुङ र पुरुषोत्तम यादव स्थलमै आइपुगे । उनीहरूले पथलैयामा भएको झडप योजनाबद्ध रूपमा एमाले कार्यकर्ताले सञ्चालन गरेको दाबी गरे ।

गुरुङले भने, ‘जेनजीमाथि हातपात गर्नेहरूलाई तुरुन्त सार्वजनिक गरिनुपर्छ । सुरक्षा व्यवस्थामा लापरबाही गर्ने अधिकारीमाथि कडा कारबाही गर्नुपर्छ । यो साधारण घटना होइन, संगठित रूपमै जेनजीमाथि आक्रमण भयो ।’

जेनजीले घटनामा संलग्न वडाध्यक्ष, नगरप्रमुखदेखि सांसदसम्म जो–कोही भए पनि कानुनी दायरामा ल्याउन आवश्यक रहेको जोड दिए ।

जिल्ला प्रहरी कार्यालय बाराका एसपी सन्तोष तामाङले जेनजीले दर्ता गरेका जाहेरीका आधारमा दोषीको पहिचान र खोजी चलिरहेको बताए । ‘अनुसन्धान निष्पक्ष छ । संलग्न जो–कोहीमाथि कारबाही हुन्छ,’ एसपी तामाङले भने ।

प्रमुख जिल्ला अधिकारी मिश्रले जेनजीले राखेका मागलाई प्रशासनले गम्भीरतापूर्वक लिएको र सकेसम्म छिटो सम्बोधनमा जाने बताए । ‘समस्या समाधान र शान्ति सुरक्षा सर्वोच्च प्राथमिकतामा छ । मागहरू कार्यान्वयनका लागि आवश्यक प्रक्रिया तत्क्षणौ अघि बढाइनेछ,’ मिश्रले भने ।

बुधबार सिमरामा एमाले कार्यकर्ता र जेनजी प्रदर्शनकारीबीच झडप भएपछि स्थिति तनावपूर्ण बनेको थियो । भीड नियन्त्रणका क्रममा बिहीबार प्रहरीले गोली समेत प्रहार गरेको थियो । प्रशासनले तत्काल कफ्र्यु जारी गर्दै थप हिंसा रोक्न सुरक्षा व्यवस्था कडा पारेको थियो ।