जनकपुरधाम, ५ मंसिर । विवाह पञ्चमीको अवसरमा नेपाल–भारत खुला सीमा संवाद समूह र क्लोथ बैंक जनकपुरधामले संयुक्त रूपमा यात्रु तथा भक्तजनका लागि आवास, नास्ता तथा स्वास्थ्य सेवा उपलब्ध गराउने विशेष सेवा शिविर सञ्चालन गरेको छ ।

हजारौँ आगन्तुकले सहभागिता जनाउने विवाह पञ्चमीलाई व्यवस्थित र सुरक्षित बनाउन सञ्चालन गरिएको यो शिविरलाई स्थानीयस्तरमा सकारात्मक पहलका रूपमा हेरिएको छ ।

समितिका अनुसार करिब १,००० जना श्रद्धालुका लागि ठूलो बसोबास सुविधा पुरानो मिनाप परिसरमा निर्माण गरिएको विशाल टेन्टमार्फत उपलब्ध गराइएको छ । त्यस्तै, युनियन प्रेस नजिकको अर्को टेन्टमार्फत १००–१५० जनाले थप सुत्ने व्यवस्था पाउने छन् । भीडभाड बढ्ने अनुमान गर्दै दिनरात निरन्तर सेवा प्रदान गर्न स्वयंसेवकहरू परिचालन गरिएको समितिले जनाएको छ ।

नास्ता व्यवस्थाका लागि घुग्नी, चिउरा, मुरही, खुर्सानी, चिया र स्वच्छ पानी दिनभर निःशुल्क उपलब्ध हुनेछ । यात्रुहरूको स्वास्थ्य सुरक्षालाई प्राथमिकतामा राख्दै शिविरमै प्राथमिक उपचार सेवा समेत मिलाइएको क्लोथ बैंकले जानकारी दिएको छ ।

स्थापना भएदेखि सात वर्षको अवधिमा क्लोथ बैंकले जनकपुरधामका विविध सांस्कृतिक तथा धार्मिक कार्यक्रम परिक्रमा, रामनवमी, कमला मेला, विवाह पञ्चमीमा निरन्तर सेवा शिविर चलाउँदै आएको छ ।

संस्थाका अध्यक्ष राजीव झाका अनुसार जनकपुरधाममा पनि काठमाडौँझैं युवा स्वयंसेवकहरू आफै आएर नाम दर्ता गरी सामाजिक कार्यमा जोडिने वातावरण बनाउनु नै संस्थाको दीर्घकालीन लक्ष्य हो ।

झाले भने, ‘जनकपुरमा अझै व्यवस्थित स्वेच्छिक सेवा प्रणाली तयार भएको छैन । मानिसहरूमा सामाजिक कामप्रति आकर्षण र स्वयंसेवक बन्ने संस्कार विकसित होस् भन्ने मेरो चाहना हो ।’

विवाह पञ्चमीमा देश विदेशबाट लाखौं भक्तजन आउने हुँदा आवश्यक पूर्वाधार कमजोर हुने समस्या विगतदेखि देखिँदै आएको छ । भीड व्यवस्थापनलाई ध्यानमा राख्दै क्लोथ बैंक र संवाद समूहले उपमहानगरपालिकासँग तात्कालिक रूपमा थप शौचालय निर्माण र व्यवस्थापन गर्न विशेष अनुरोध गरेका छन् ।

आयोजकको भनाइअनुसार यस्तो सेवा शिविरले यात्रुहरूलाई सुरक्षित, स्वच्छ र सहज वातावरण प्रदान गर्दै सांस्कृतिक पर्यटन प्रवद्र्धनमा पनि महत्वपूर्ण योगदान पुर्याउनेछ ।

भक्तजनका लागि आवासदेखि स्वास्थ्य सेवा उपलब्ध गराउँदा जनकपुरधाम धार्मिक गन्तव्यका रूपमा अझ व्यवस्थितरूपमा प्रस्तुत हुने विश्वास आयोजकले व्यक्त गरेका छन् ।