सप्तरी, २६ कार्तिक । सप्तरीको सदरमुकाम राजविराज बजारको मुख्य सडकमा सवारीसाधन पार्किङ र अतिक्रमण बढ्दै गएपछि सर्वसाधारणले दैनिक जीवनमा समस्या भोग्नुपरेको छ ।

मुख्य सडकहरूमा अत्यधिक भिडभाडका कारण मानिसहरूलाई सडकबाट हिँडडुल गर्न, बाटो काट्न र समयमै गन्तव्यमा पुग्न कठिनाइ भएको छ ।

राजविराज बजारमा मालपोत कार्यालयदेखि जिल्ला प्रशासन कार्यालय, माइक्रो स्डेन्टदेखि छिन्नमस्ता अस्पताल र जनआन्दोलन चौकदेखि राममन्दिरसम्मको सडकमा स–साना व्यापारीहरूले सडकको छेउमा पसल स्थापना गर्दै अतिक्रमण गरेपछि अवस्था बिग्रिएको छ ।

राजविराज उच्च अदालत बार एसोसिएसनका उपाध्यक्ष धर्मेन्द यादवले भने, ‘स–साना व्यापारीहरूले सडकमा पसल सञ्चालन गर्दा पाँच मिनेटमा पुग्ने दूरीमा १० मिनेट लाग्ने भएको छ । दुर्घटनाको जोखिम पनि बढेको छ ।’

सडकमा दुई पांग्रे र चार पांग्रे सवारीसाधन पार्किङ बढ्दा एम्बुलेन्सजस्ता आपतकालीन गाडीहरू पनि सडकबाट सञ्चालन गर्न रोकिएका उदाहरण देखिएका छन् ।

एम्बुलेन्स चालक विजय देवले भने, ‘भीडभाड र मनपरी पार्किङका कारण ज्यानको जोखिम बढेको छ ।’

करोडौंको लगानीमा बनेको राजविराज–२ स्थित बसपार्कको उद्घाटन भएको पाँच महिना बितिसक्दा पनि अझै सञ्चालनमा आउन सकेको छैन । यसकै कारण सडकमै सवारीसाधन पार्किङ, तरकारी बजार र अतिक्रमण भएका पसलहरूले सर्वसाधारणलाई समस्या दिन जारी राखेको स्थानीयवासीको गुनासो छ ।

राजविराज नगरपालिकाका कार्यवाहक नगरप्रमुख इसरत प्रविणले भनिन्, ‘सडक अतिक्रमण घटाउन हामी पटक पटक प्रयास गरिसकेका छौँ । हटाइएका पसलका लागि छुट्टाइएको स्थान तयार छ । एक महिनाभित्र व्यवस्थापन सकिनेछ ।’

प्रमुखले थपिन्, ‘बसपार्क सञ्चालनका लागि टेन्डर प्रक्रिया अगाडि बढाइएको छ । सम्झौता भएसँगै सडकमा पार्किङ र अतिक्रमणको समस्या अन्त्य हुनेछ । सबै नागरिकले समुदायप्रति आफ्नो दायित्व बुझ्नुपर्ने हुन्छ ।’

तस्बिरहरू: नन्दन झा