जनकपुरधाम, २२ कार्तिक । नेपाली कांग्रेसका नेता एवम् पूर्वमन्त्री मोहम्मद अफताव आलमको ६३ वर्षको उमेरमा निधन भएको छ ।

उच्च रक्तचाप र मधुमेहलगायत स्वास्थ्य समस्या देखिएपछि विगत एक महिनादेखि काठमाडौँ मेडिकल कलेज सिनामंगलमा उपचाररत आलमको शनिबार बिहान २ बजे उपचारकै क्रममा निधन भएको अस्पताल स्रोतले जनाएको छ ।

दशैँअघि अस्पताल भर्ना भएका आलमलाई पछिल्लो सातादेखि स्वास्थ्य अवस्था गम्भीर भएपछि भेन्टिलेटरमा राखिएको थियो । अस्पतालका सञ्चालक एवम् नेपाली कांग्रेसका निवर्तमान सांसद डा. सुनिल शर्माका अनुसार उपचारका क्रममा उनको निधन भएको हो ।

वि.सं. २०५१ को उपनिर्वाचनमार्फत पहिलोपटक प्रतिनिधिसभा सदस्य बनेका आलमले श्रम राज्यमन्त्री (२०५४) र वन राज्यमन्त्री (२०५५) का रूपमा कार्य गरेका थिए । त्यसपछि २०५६ र २०६४ को निर्वाचनमा पनि उनी विजयी भएका थिए ।

राजनीतिक यात्रामा उनले भूमि सुधार तथा श्रम–यातायात मन्त्रीको जिम्मेवारी पनि सम्हालेका थिए । वि.सं. २०६७ मा भएको कांग्रेसको १२औं महाधिवेशनबाट उनी केन्द्रीय सदस्य निर्वाचित भएका थिए ।

रौतहटको राजपुरमा २०६४ सालको संविधानसभा निर्वाचनअघि भएको बम विस्फोट घटनासँग सम्बन्धित प्रकरणमा आलम जन्मकैदको सजायपछि कारागारमा रहेका थिए । पछिल्लो जेठ १४ गते रौतहट जिल्ला अदालतको आदेशपछि जेलमुक्त भएका उनी त्यसको केही दिनमै ब्रेन स्ट्रोकबाट पीडित बनेका थिए ।

रौतहटको राजपुर फरहदवा गाउँपालिका–४ मा वि.सं. २०१९ असार ५ गते जन्मिएका आलमले २०३६ सालमा नेपाल विद्यार्थी संघमार्फत राजनीतिक यात्रा सुरु गरेका थिए । उनले पार्टीको विभिन्न तहमा रहेर मधेशमा कांग्रेस संगठन सुदृढीकरणमा योगदान दिएका थिए ।

आलमका दुई छोरा र एक छोरी रहेका छन् ।

कांग्रेसको शोकप्रस्ताव
नेपाली कांग्रेसले पार्टीका वरिष्ठ नेता एवम् पूर्वमन्त्री आलमको निधनप्रति गहिरो शोक प्रकट गरेको छ ।

कार्यबाहक सभापति पूर्णबहादुर खड्काको अध्यक्षतामा शनिबार बसेको आकस्मिक केन्द्रीय कार्यसमितिको बैठकले आलमप्रति श्रद्धाञ्जलि अर्पण गर्दै एक मिनेट मौन धारण गरेको पार्टी केन्द्रीय कार्यालयका मुख्यसचिव कृष्णप्रसाद पौडेलले जानकारी दिए ।

बैठकले वि.सं. २०८२ कार्तिक २२, २३ र २४ गतेसम्म पार्टीका केन्द्र, प्रदेश र जिल्ला कार्यालयमा झण्डा आधा झुकाउने, कार्तिक २३ गते कार्यालयहरू बन्द गर्ने र १३ दिनसम्म शोक पुस्तिका राख्ने निर्णय गरेको छ ।

पार्टीले आलमले लोकतन्त्र स्थापनादेखि पुनःस्थापनासम्मका आन्दोलनमा निभाएको भूमिकाको उच्च प्रशंसा गर्दै उनको आत्माको चिरशान्तिको कामना गरेको छ ।