जनकपुरधाम, २१ कार्तिक । भारतको बिहार राज्यमा हुने विधान सभा निर्वाचनका कारण मधेश प्रदेशसँग जोडिएका विभिन्न नेपाल–भारत सीमानाका चार दिनका लागि बन्द हुने भएका छन् ।

जिल्ला प्रशासन कार्यालयहरूले शुक्रबार सूचना जारी गर्दै शनिबार साँझ ६ बजेदेखि मङ्गलबार साँझ ६ बजेसम्म सीमावर्ती नाकाहरूबाट हुने मानवीय तथा आकस्मिक सेवा बाहेकका सम्पूर्ण आवागमन पूर्ण रूपमा रोक लगाइने जानकारी दिएका छन् ।

बिहार राज्यमा यही मङ्गलबार दोस्रो चरणको विधान सभा निर्वाचन हुँदैछ । शान्ति सुरक्षा व्यवस्थापनका लागि बिहार सरकारको अनुरोधमा नेपाली प्रशासनले पनि सघन सुरक्षा व्यवस्था अपनाउँदै नाकाहरू अस्थायी रूपमा बन्द गर्ने निर्णय गरेको हो ।

जिल्ला प्रशासन कार्यालय धनुषाका सहायक प्रमुख जिल्ला अधिकारी उमेशकुमार दाहालका अनुसार कार्तिक २५ गतेसम्मका लागि सबै सीमानाका बन्द गरिने छन् ।

उनले भने, ‘निर्वाचन अवधिमा कुनै अवाञ्छित गतिविधि हुन नदिनका लागि नेपाल–भारत सीमानाका शनिबार साँझ ६ बजेदेखि मङ्गलबार साँझ ६ बजेसम्म बन्द रहनेछ । आकस्मिक र मानवसेवा सम्बन्धी आवागमन मात्र अनुमति दिइनेछ ।’

त्यस्तै, महोत्तरी जिल्ला प्रशासन कार्यालयले पनि शुक्रबार सूचना जारी गर्दै सोही अवधिसम्म नाका बन्द हुने जनाएको छ । सहायक प्रमुख जिल्ला अधिकारी संजयकुमार पोखरेलका अनुसार प्रशासनले स्थानीय तहका प्रतिनिधि, सुरक्षा निकाय र सीमा नजिकका बासिन्दालाई आवश्यक सावधानी अपनाउन आग्रह गरेको छ ।

यसैबीच, रौतहट जिल्ला प्रशासन कार्यालयका प्रमुख जिल्ला अधिकारी दिपेश सागर भुसालले पनि बिहार राज्यको सितामढी र पूर्वी चम्पारण जिल्लामा हुने विधान सभा निर्वाचनका कारण सीमानाका बन्द हुने बताएका छन् । उनले शान्ति सुरक्षाका दृष्टिले सीमाक्षेत्रमा प्रहरी र सशस्त्र प्रहरीले संयुक्त गस्ती गर्ने व्यवस्था मिलाइएको जनाएका छन् ।

सीमावर्ती नाका बन्दसँगै नेपाल–भारत रेल सेवा पनि अस्थायी रूपमा स्थगित भएको छ । नेपाल रेल्वे कम्पनी लिमिटेडका अनुसार बिजलपुर–कुर्था–जनकपुरधाम–जयनगर रेल सेवा आगामी चार दिनका लागि बन्द हुनेछ । कम्पनीले एक विज्ञप्ति जारी गर्दै भारतको जयनगरसम्म पुग्ने रेल सेवा सीमावन्दी अवधिभर नचल्ने र नाका खुलेपछि पुनः सञ्चालनमा ल्याइने जनाएको छ ।

सीमावन्दीका कारण मधेश प्रदेशका धनुषा, महोत्तरी र रौतहट जिल्लामा पर्ने सीमाक्षेत्रमा दैनिक पारगमन गर्ने स्थानीयवासी प्रभावित हुने भएका छन् । प्रशासनले सर्वसाधारणलाई आवश्यक सामानको भण्डारण अघि नै गर्न र तोकिएको समयसम्म सीमा पार नगर्न अनुरोध गरेको छ ।

नेपाल–भारत खुला सिमानाका कारण दुवै देशका नागरिकबीच हुने आवागमन अत्यन्त घनिष्ट हुने गरेकोमा बिहार विधान सभा निर्वाचनको सुरक्षालाई ध्यानमा राखी अस्थायी रूपमा नाका बन्द गरिएको प्रशासनले जनाएको छ ।