रौतहट, २१ कार्तिक । भारतको बिहार राज्यमा हुन लागेका विधान सभा चुनावका कारण नेपाल–भारत सीमावर्ती क्षेत्रस्थित रौतहटका नाकाहरू चार दिनका लागि बन्द गरिने भएका छन् ।

जिल्ला प्रशासन कार्यालय रौतहटले शुक्रबार सार्वजनिक गरेको सूचनाअनुसार भारतको सितामढी र पूर्वी चम्पारण जिल्लामा यही कार्तिक २५ गते दोस्रो चरणको विधान सभा निर्वाचन हुँदैछ । त्यसको सुरक्षालाई मध्यनजर गर्दै नाका बन्द गर्ने निर्णय गरिएको हो ।

प्रमुख जिल्ला अधिकारी दिपेश सागर भुसालका अनुसार निर्वाचन अवधिमा शान्ति–सुरक्षा व्यवस्थापन सुदृढ बनाउन कार्तिक २२ गते साँझ ८ बजेदेखि २५ गते बेलुका ६ बजेसम्म नेपाल–भारत सीमा नाकामा आवश्यक सेवाबाहेक सम्पूर्ण आवागमन रोक लगाइने छ ।

‘भारतको विधान सभा निर्वाचनका कारण सीमाक्षेत्रमा सुरक्षा संवेदनशीलता बढ्ने भएकाले नेपालतर्फ पनि सतर्कता अपनाइएको हो,’ प्रमुख जिल्ला अधिकारी भुसालले भने, ‘निर्धारित समयसम्म सर्वसाधारणले नाकाबाट ओहोरदोहोर नगर्न अनुरोध गरिएको छ। ’
प्रशासनका अनुसार यस अवधिमा नेपाल र भारतबीचका गौर, इनरुवा, फतुवा, रौतापुर, श्रीरामपुर, छितौन, अजगैबी लगायतका नाकाहरू बन्द रहनेछन् । अत्यावश्यक सेवाका सवारीसाधन र एम्बुलेन्सका लागि भने विशेष अनुमति पत्रका आधारमा मात्र आवागमन हुने बताइएको छ ।

सुरक्षालाई लक्षित गर्दै नेपाल प्रहरी, सशस्त्र प्रहरी र स्थानीय प्रशासनबीच संयुक्त समन्वय गरिएको छ । सीमाक्षेत्रमा अतिरिक्त सुरक्षा टोलीहरू परिचालन गरिने र अनावश्यक भीडभाड तथा गतिविधि नगर्न सर्वसाधारणलाई आग्रह गरिएको प्रशासनले जनाएको छ ।

रौतहट जिल्ला भारतको बिहार राज्यसँग ७६ किलोमिटर सीमा जोडिएको छ । हरेक चुनाव अवधिमा भारतीय पक्षको सुरक्षा संवेदनशीलता बढ्ने भएकाले नेपाली प्रशासनले पनि नाकामा अस्थायी नियन्त्रणको अभ्यास गर्दै आएको छ ।

‘हामीले सीमा क्षेत्रमा हुने अवैध गतिविधि, सशस्त्र आवागमन वा आपराधिक क्रियाकलाप रोक्नका लागि भारत–नेपाल प्रशासनबीच सहकार्य गरिरहेका छौं,’ प्रमुख जिल्ला अधिकारी भुसालले थपे, ‘निर्वाचन सकिएलगत्तै अवस्था सामान्य बनाइनेछ ।’