रौतहट, २१ कार्तिक । रौतहट प्रहरीले पछिल्ला दिनमा सञ्चालन गरेको विशेष अपरेसनमार्फत विभिन्न आपराधिक घटनामा संलग्न ११ जना प्रतिवादीलाई पक्राउ गरेको छ । पक्राउ परेकामध्ये दुई जना गत भदौ २४ गते जेनजी आन्दोलनको क्रममा गौर कारागारबाट भागेका थुनुवा पनि रहेका छन् ।

जिल्ला प्रहरी कार्यालय रौतहटका प्रमुख एसपी रबिन कार्कीका अनुसार पक्राउ परेकामध्ये कर्तव्य ज्यान, जबरजस्ती करणी, चेक बाउन्स, कुटपिट, आगजनी र लुटपाट जस्ता मुद्दामा संलग्न व्यक्ति छन् । प्रहरीले फरार अभियुक्तहरूलाई गाउँघरमा लुकीछिपी बसेको अवस्थामा पत्ता लगाउँदै पक्राउ गरेको जनाएको छ ।

गौर कारागारबाट भदौमा भागेका थुनुवामध्ये कर्तव्य ज्यान मुद्दाका कैदी चन्द्रपुर–१ निवासी ४७ वर्षीय नागेन्द्र माझीलाई प्रहरीले कार्तिक १९ गते गाउँघरमा लुकीछिपी बसिरहेको अवस्थामा पक्राउ गरी पुनः कारागार कार्यालय गौरमा बुझाएको जनाएको छ ।

त्यस्तै, जबरजस्ती करणी मुद्दाका फरार थुनुवा देवाही गोनाही–६ निवासी सुधीरकुमार रामले पनि १९ गते स्वेच्छाले कारागारमा उपस्थित भएका छन् ।

आर्थिक अपराधमा संलग्न फरार व्यक्तिहरू पनि प्रहरीले समातेको छ । गरुडा नगरपालिका–५ शिवनगरका ३५ वर्षीय अभयकुमार प्रसाद साहले माधवनारायण–१ का प्रयाग महतोसँग आठ लाख रुपैयाँ सापटी लिएर दिएको चेक बाउन्स भएपछि फरार रहेका थिए । उनलाई प्रहरीले कार्तिक १८ गते पक्राउ गरेको जनाएको छ ।

त्यस्तै, बौधीमाई नगरपालिका–१ अजगैबिका ३० वर्षीय किशोरी प्रसाद यादवले परोहा–७ का पवनकुमार यादवसँग १ लाख ७५ हजार रुपैयाँ सापटी लिएर दिएको चेक बाउन्स भएपछि फरार रहेका थिए । उनलाई पनि १८ गते पक्राउ गरिएको हो ।

राजदेवी नगरपालिका–८ का दिनेश कुमार चौधरी कलवारलाई पनि प्रहरीले अदालतको पुरानो फैसला अनुसार पक्राउ गरेको छ ।रौतहट जिल्ला अदालतको २०६१ सालको फैसलाअनुसार १ वर्ष १ महिना १५ दिन कैद र १ लाख ५४ हजार ७ सय रुपैयाँ जरिवाना ठहर भएका चौधरीलाई प्रहरीले कार्तिक १५ गते पक्राउ गरी अदालतमा पेश गरेको हो ।

प्रहरीका अनुसार गरुडा नगरपालिका–६ का राजकिशोर यादवले गत साउन ३० गते शम्भु माझीलाई कुटपिट गरी घाइते बनाएका थिए । उनलाई १७ गते पक्राउ गरिएको छ ।

त्यस्तै, वृन्दावन नगरपालिका–३ का ४० वर्षीय युगल किशोर यादवले साउन १५ गते प्रेमशंकर यादवमाथि फलामको रड प्रहार गरी घाइते पारेको अभियोगमा १७ गते पक्राउ परेका हुन् ।

त्यस्तै, माधवनारायण–४ का रामअज्ञा मुखियाले आफ्नै गाउँमा रामएकवाल मुखियामाथि धारिलो खुर्पीले आक्रमण गरी घाइते पारेको अभियोगमा १९ गते पक्राउ गरिएको प्रहरीले जनाएको छ ।

यसैगरी, वृन्दावन नगरपालिका–८ बहुअरीका ३० वर्षीय नईमुद्दिन दर्जीले मनोज प्रसाद यादवको घरमा आगजनी गरी खाद्यान्न नष्ट गरेको अभियोगमा १७ गते पक्राउ गरिएको हो ।

गत जेठ १४ गते बिहान गरुडा–६ पोठियाहीमा मर्निङ वाकमा रहेका धिरज कुमार राममाथि हतियार देखाई मोबाइल लुटपाट गर्ने ईशनाथ नगरपालिका–३ का २१ वर्षीय मनिष कुमार साहलाई प्रहरीले १८ गते झाझ पुलनजिकैबाट पक्राउ गरेको जनाएको छ ।

यस्तै, ईशनाथ नगरपालिका–७ का जादोलाल साहलाई पनि अदालतको फैसलाअनुसार एक महिनाको कैद सजाय भुक्तान गर्नुपर्ने भएपछि १९ गते पक्राउ गरी अदालतमा उपस्थित गराइएको छ ।

जिल्ला प्रहरी कार्यालय रौतहटका सहप्रवक्ता इन्स्पेक्टर रुद्र कँडेलका अनुसार सबै पक्राउ परेकामाथि आवश्यक कानुनी प्रक्रिया अघि बढाइएको र थप अनुसन्धान जारी रहेको छ ।

उनका अनुसार पछिल्लो समयमा जिल्लाभर फैलिएका फरार अभियुक्त र पुराना मुद्दाका दोषीहरूलाई नियन्त्रणमा लिन क्लिन अप अपरेसन सञ्चालन गरिएको हो ।