सर्लाही, २० कार्तिक । ठेकेदारको लापरबाहीका कारण हुलाकी राजमार्गको मलङ्गवा खण्ड वर्षौंदेखि अधुरो रहँदा सदरमुकामका बासिन्दा धुलो र दुर्गन्धको मारमा परेका छन् ।

पूर्वपश्चिम हुलाकी राजमार्गका अधिकांश खण्डमा कालोपत्रे सकिए पनि मलङ्गवाको टावरचोकदेखि झन्डाबजारसम्मको झन्डै सात सय मिटर सडक अझै पनि अधुरै छ ।

सडक अधुरो रहँदा स्थानीय व्यापारीदेखि सर्वसाधारणसम्मको दैनिक जीवन प्रभावित बनेको छ । धुलोका कारण व्यवसायीहरूले सामान बिग्रने, बालबालिका र वृद्धवृद्धामा स्वासप्रश्वासका समस्या बढ्ने गुनासो गर्दै आएका छन् ।

‘धुलोको कारण यहाँ बिहान–साँझ हिँड्नै नसक्ने अवस्था छ,’ मलङ्गवा–२ का स्थानीय सोहन झाले भने, ‘हामीले पटक पटक आन्दोलन गर्दा पनि ठेकेदारले हजम गर्न सकेन ।’

यही अवस्थाप्रति रोष प्रकट गर्दै स्थानीयले मलङ्गवा नगर संरक्षण तथा सुधार समिति गठन गरी सडक कालोपत्रे मागमा दबाब अभिव्यक्त गरेका थिए । सोही समितिको अगुवाइमा बुधबार राजमार्गमा अनिश्चितकालीन चक्काजाम गरिएको थियो । आन्दोलन सुरु भएपछि ठेकेदार कम्पनीले निर्माण सामग्री स्थलमा पुर्याएपछि तत्कालका लागि आन्दोलन स्थगन गरिएको समितिले जनाएको छ ।

हिमडुङ एण्ड ठोकर÷हिरा एण्ड नमिता जेभीले सन् २०१६ (२०७३ असार मसान्त) भित्रै काम सम्पन्न गर्ने गरी ठेक्का पाएको भए पनि २०७६ सालमै कालोपत्रे हुनुपर्ने सडक अझै बेस तहमा मात्र सीमित छ ।

हुलाकी राजमार्ग निर्देशनालय, योजना कार्यालय जनकपुरधामका इन्जिनियर रञ्जित रायका अनुसार सडक विभागले ठेकेदारलाई सात पटक म्याद थप गरिसकेको छ ।

‘अब आठौँ पटक म्याद थप्ने तयारी थियो । तर, जेनजी आन्दोलनका कारण प्रक्रिया केही ढिलो भएको हो,’ उनले भने ।

इन्जिनियर रायका अनुसार हालसम्म सडकको बेस बिछ्याउने काम मात्र सम्पन्न भएको छ । ‘ठेकेदारले अत्यन्त सुस्त गतिमा काम गरिरहेको छ,’ उनले बताए । स्थानीय दबाबपछि जिल्ला प्रहरी कार्यालय सर्लाहीको मध्यस्थतामा ठेकेदार चन्द्रिका साह र स्थानीयबीच छलफल गरिएको छ ।

प्रहरीका अनुसार छलफलमा ठेकेदार साहले बाँकी काम तत्काल अघि बढाउने लिखित प्रतिबद्धता जनाएका छन् । तथापि, स्थानीयवासीहरूले पटक पटकको आश्वासन अब विश्वास गर्न नसकिने भन्दै काम नबढे पुनः सडक अवरुद्ध गर्ने चेतावनी दिएका छन् ।

सडक कालोपत्रे नभएपछि मलङ्गवा बजारको विकास मात्र नभई जनस्वास्थ्यमा पनि असर परेको छ । स्थानीय स्वास्थ्यकर्मीहरूका अनुसार धुलो र प्रदूषणका कारण श्वासप्रश्वासका समस्या बढ्दै गएका छन् ।