जनकपुरधाम, २० कार्तिक । जनकपुरधाम–ढल्केवर ६ लेन व्यापारिक राजमार्गमा तीन वटा आकाशे पुल निर्माणको कार्य सुरु गरिएको छ ।

पैदल यात्रीको सुरक्षाका लागि करिब साढे १० करोड रुपैयाँ लागतमा सडक डिभिजन कार्यालय मुजेलियाले सो आकाशे पुलहरूको निर्माण सुरु गरेको हो ।

धनुषाको क्षिरेश्वरनाथ नगरपालिका र लक्ष्मीनिया गाउँपालिकामा आकाशे पुल निर्माण गर्न लागिएको हो । अत्यधिक पैदल चाप हुने स्थानका रूपमा रहेका क्षिरेश्वरनाथको महिला विकास चोक र सखुवा चोकमा दुई वटा तथा लक्ष्मीनियाको बजार चोकमा एक वटा पुल निर्माण गरिँदैछ ।

सडक डिभिजन कार्यालयका प्रमुख डिभिजनल इन्जिनियर दरोगा प्रसादका अनुसार क्षिरेश्वरनाथको महिला विकास चोकमा ३ करोड ३५ लाख, सखुवा चोकमा ३ करोड ५७ लाख र लक्ष्मीनियामा ३ करोड ४२ लाख रुपैयाँ भ्याटसहितको लागतमा दुई फरक निर्माण कम्पनीले काम सुरु गरिसकेका छन् ।

‘तीनै स्थानमा निर्माण कार्य तीव्र गतिमा भइरहेको छ । सबै पुल यसै आर्थिक वर्षको असार मसान्तभित्र सम्पन्न गर्ने लक्ष्य लिइएको छ,’ प्रसादले भने ।

सडक डिभिजन कार्यालयका साईट इन्जिनियर उज्जवल झाका अनुसार प्रत्येक पुलको उचाइ ५.६ मिटर, लम्बाइ २९.४ मिटर र चौडाइ ३ मिटर हुनेछ ।

‘आकाशे पुल निर्माण सम्पन्न भएपछि सडक पार गर्ने पैदल यात्रुका लागि ठूलो सहजता हुनेछ र दुर्घटना न्यूनीकरणमा पनि सहयोग पुग्नेछ,’ उनले भने ।

जिल्ला ट्राफिक प्रहरी कार्यालय धनुषाका प्रमुख प्रहरी निरीक्षक सूर्य बहादुर शाहीले पनि आकाशे पुल निर्माणपछि दुर्घटनाको दर घट्ने विश्वास व्यक्त गरे ।

उनले भने, ‘पूर्व–पश्चिम लोकराजमार्ग भएर जनकपुरधाम प्रवेश गर्ने यो सडकमा दैनिक सयौँ पैदल यात्री हिँड्छन् । पुल निर्माणपछि पैदल यात्रुलाई सडक पार गर्न सुरक्षाको भरपर्दो माध्यम उपलब्ध हुनेछ ।’

स्थानीय बासिन्दा पनि आकाशे पुल निर्माणको पहलप्रति खुसी छन् । क्षिरेश्वरनाथका स्थानीय विजय साह भन्छन्, ‘हाम्रो क्षेत्रमा हाट बजार र विद्यालय नजिकै सडक छ । यसले गर्दा सडक काट्दा जोखिम बढेको थियो । अब पुल बनेपछि बालबालिका र वृद्धवृद्धालाई राहत मिल्नेछ ।’

जनकपुरधाम–ढल्केवर ६ लेन सडकलाई प्रदेशको प्रमुख व्यापारिक राजमार्गको रूपमा विकास गरिँदै आएको छ । यस सडकमा दैनिक हजारौँ सवारी साधन गुड्ने र घना आवासीय क्षेत्रबाट गुज्रिने भएकाले आकाशे पुल निर्माणले यातायात सुरक्षा र पैदल आवागमनमा नयाँ सहजता ल्याउने विश्वास लिइएको छ ।