जनकपुरधाम, २० कार्तिक । आगामी फागुन २१ गते हुने प्रतिनिधि सभा निर्वाचन नजिकिँदै जाँदा धनुषा जिल्लामा मतदाता नामावली अद्यावधिक र नयाँ नाम दर्ता गराउने नागरिकको भीड दिनानुदिन बढ्दै गएको छ ।

सरकारले निर्वाचनको मिति घोषणा गरेसँगै निर्वाचन आयोगको जनकपुरधामस्थित मधेश प्रदेश कार्यालय तथा धनुषाका विभिन्न निर्वाचन कार्यालयमा नयाँ मतदाता नामावली सङ्कलन, अद्यावधिक र सच्याउने कार्य तिब्र गतिमा भइरहेको छ ।

निर्वाचन आयोगको नयाँ कार्यक्रम अन्तर्गत नागरिकहरूले फारम भर्ने, फोटो खिचाउने, नयाँ नाम दर्ता गर्ने, विवरण सच्याउने, ठेगाना सार्ने, दोहोरो नाम हटाउने र मृतकको नाम हटाउने काम विधिवत रूपमा भइरहेको जनाइएको छ ।

मधेश प्रदेश निर्वाचन कार्यालय जनकपुरधामका कम्प्युटर अधिकृत कृष्णचन्द्र राउतका अनुसार निर्वाचनको मिति घोषणा भएयता दैनिकरूपमा दुई सयभन्दा बढी नागरिक कार्यालयमा नयाँ मतदाता दर्ता गराउन तथा फोटो खिचाउन आउँछन् ।

‘सरकारले फागुन २१ गते प्रतिनिधि सभा निर्वाचनको मिति सार्वजनिक गरेपछि मतदाता बन्ने र आफ्नो विवरण अद्यावधिक गर्ने नागरिकको भीड असामान्य रूपमा बढेको छ,’ उनले भने ।

राउतका अनुसार १६ वर्ष पूरा भई नेपाली नागरिकता प्राप्त गरेका जो कोहीले पनि नेपालको जुनसुकै निर्वाचन कार्यालयमा पुगेर मतदाता नामावलीमा आफ्नो नाम समावेश गराउन सक्ने व्यवस्था भएकाले जनकपुरधाममा भीड बढेको हो । अनलाइन प्रणालीमार्फत विवरण भरेर प्रत्यक्ष उपस्थित भई फोटो खिचाउने प्रावधानका कारण पनि दर्ता प्रक्रिया सहज बनेको उनले बताए ।

संविधानअनुसार आगामी निर्वाचनमा मतदान गर्नका लागि २०८२ साल फागुन २० गतेसम्म १८ वर्ष उमेर पूरा भएको हुनुपर्ने व्यवस्था छ । यस कारण अहिले १६ वर्ष पूरा गरेका किशोरकिशोरीहरू समेत उत्साहका साथ मतदाता नामावलीमा आफ्नो नाम दर्ता गराइरहेका छन् ।

हालैको जेनजी पुस्ताको राजनीतिक सक्रियता र आन्दोलनपछि युवा पुस्ता मतदाता बन्ने र निर्वाचन प्रक्रियामा सहभागी हुनेतर्फ बढी अग्रसर भएको देखिन्छ ।जनकपुरधामस्थित मधेश प्रदेश कार्यालयका कर्मचारीहरूका अनुसार युवा र विद्यार्थी वर्गको उपस्थितिलाई ध्यानमा राख्दै बिहान ७ बजेदेखि बेलुकी ६ बजेसम्म फोटो खिच्ने र विवरण संकलन गर्ने काम भइरहेको छ ।

धनुषा जिल्लामा हाल ४ वटा प्रतिनिधि सभा निर्वाचन क्षेत्र रहेका छन् । पछिल्लो तथ्याङ्क अनुसार जिल्लामा २ लाख ५७ हजार ३ सय ७३ पुरुष, २ लाख २४ हजार २ सय १३ महिला र ७ जना अन्य गरी कुल ४ लाख ८१ हजार ५ सय ९३ जना मतदाता दर्ता भइसकेका छन् ।

असोज ९ गतेदेखि सुरु भएको र कार्तिक ३० गतेसम्म चल्ने नयाँ मतदाता नामावली सङ्कलन तथा अद्यावधिक कार्यक्रम अन्तर्गत दर्ता हुने मतदाताहरूलाई फागुन २० गतेसम्म मतदाता सूचीमा समावेश गरिने मधेश प्रदेश निर्वाचन कार्यालयले जनाएको छ ।

आयोगका अधिकारीहरूका अनुसार निर्वाचन नजिकिँदै जाँदा अझ धेरै नागरिकले अन्तिम समयमा दर्ता गराउने सम्भावना रहेकाले आवश्यक तयारी र जनशक्ति परिचालनमा तीव्रता दिइएको छ ।